Microsoft Word экология лотин doc

Ekologik  ekspertiza  deganda  rejalashtirilayotgan  yoki  amalga 
oshirilayotgan  xo‘jalik  va  boshqa  xil  faoliyatning  ekologik  talablarga 
muvofiqligini  belgilash  hamda  ekologik  ekspertiza  obyektini  ro‘yobga 
chiqarish mumkinligini aniqlash tushuniladi. 
Ekologik  ekspertizaning  maqsadi  –  tabiatni  muhofaza  qilish, 
odamlar  salomatligini  saqlash  va  jamiyatning  ekologik  xavfsizligini 
ta’minlash uchun xo‘jalik yuritishdagi zararli faoliyatlarning oldini olish. 
Ekologik  ekspertizaning  asosiy  vazifasi  –  muayyan  xo‘jalik 
obyektlarining  atrof  tabiiy  muhitga  va  kishilar  salomatligiga  ta’siri 
darajasini baholashdan iborat. 
O‘zbekiston  Respublikasining  «Tabiatni  muhofaza  qilish  to‘g‘-
risida»gi  va  «Ekologik  ekspertiza  to‘g‘risida»gi
1
  qonunlari  ekologik 
espertizaning huquqiy asoslari hisoblanadi.  
O‘zbekiston  Respublikasining  «Ekologik  ekspertiza  to‘g‘risida»gi 
qonuni 2000-yil 25-mayda qabul qilingan bo‘lib, 26 moddadan iborat. 
Aytish  joizki,  ekologik  ekspertiza  o‘tkazish  uchun  aniq  maqsad 
bo‘lishi  kerak.  Amaldagi  qonunda  ushbu  masalaga  alohida  e’tibor 
berilgan.  Mazkur  qonunning  3-moddasida  ko‘rsatilganidek,  ekologik 
ekspertiza quyidagi maqsadlarda o‘tkaziladi: 
– mo‘ljallanayotgan xo‘jalik va boshqa xil faoliyatni amalga oshirish 
to‘g‘risida  qaror  qabul  qilinishidan  oldingi  bosqichlarda  bunday 
faoliyatning ekologik talablarga muvofiqligini aniqlash; 
– rejalashtirilayotgan yoki amalga oshirilayotgan xo‘jalik va boshqa 
xil  faoliyat  atrof  tabiiy  muhit  holatiga  va  fuqarolar  sog‘lig‘iga  salbiy 
ta’sir  ko‘rsatishi  mumkin  bo‘lsa  yoki  shunday  ta’sir  ko‘rsatayotgan 
bo‘lsa, bunday faoliyatning ekologik xavflilik darajasini aniqlash; 
– atrof tabiiy muhitni muhofaza qilish va tabiiy resurslardan oqilona 
foydalanish  bo‘yicha  nazarda  tutilayotgan  tadbirlarning  yetarliligi  va 
asosliligini aniqlash. 
                                                
1
 Qarang: Ўзбекистон Республикаси Олий Мажлисининг Ахборотномаси. 
– 2000. – № 5-6. – 144-м. 

---

 
39
Davlat  ekologik  ekspertizasini  o‘tkazish  muddati  o‘ttiz  kundan 
oshmasligi  lozim.  Uni  o‘tkazish  muddati  davlat  ekologik  ekspertizasi 
obyektining  murakkabligiga  qarab  O‘zbekiston  Respublikasi  Tabiatni 
muhofaza  qilish  davlat  qo‘mitasining  raisi  tomonidan  ko‘pi  bilan  ikki 
oyga uzaytirilishi mumkin. 
Ekologik ekspertiza turlari asosan quyidagilardan iborat:  
1) davlat ekologik ekspertizasi;  
2) jamoat ekologik ekspertizasi;  
3) ekologik audit. 
Qonunga  asosan,  ekologik  ekspertiza  buyurtmachisi  yoki  boshqa 
manfaatdor  shaxslarning  ekologik  ekspertiza  ekspertining  faoliyatiga 
aralashuviga yo‘l qo‘yilmaydi. 
Ana  shu  talablarni  amalga  oshirish  uchun  ekologik  ekspertiza  bir 
qator prinsiplarga asoslanadi: 
1) qonuniylik; 
2) xolislik; 
3) asoslilik; 
4) ekologik xavfsizlik talablarini hisobga olishning majburiyligi; 
5) har qanday rejalashtirilayotgan xo‘jalik va boshqa xil faoliyatning 
ehtimol tutilgan ekologik xavflilik prezumpsiyasi; 
6)  xo‘jalik  va  boshqa  xil  faoliyatning  atrof  tabiiy  muhitga  va 
fuqarolar  sog‘lig‘iga  ta’sirini  baholashning  kompleksligi  («Ekologik 
ekspertiza to‘g‘risida»gi qonunning 5-m). 
Davlat  ekologik  ekspertizasi  –  ekologiya  sohasida  vakolatli  davlat 
organi tomonidan tayinlangan komissiya faoliyati bo‘lib, uning xulosasi 
butun sohalar uchun bajarilishi majburiydir. 
Jamoat ekologik ekspertizasi – ekologik asoslanish zarur bo‘lgan har 
qanday faoliyat sohasida nodavlat, notijorat tashkilotlari va fuqarolarning 
tashabbusi  bilan  amalga  oshirilishi  mumkin.  Jamoat  ekologik 
ekspertizasini amalga oshirishga to‘sqinlik qilish taqiqlanadi. 
Jamoat 
ekologik 
ekspertizasi 
davlat 
ekologik 
ekspertizasi 
o‘tkazilishidan  qat’i  nazar  amalga  oshirilishi  mumkin.  Jamoat  ekologik 
ekspertizasining xulosasi tavsiya xususiyatiga ega bo‘ladi. 
Ekologik  audit  –  ekologik  auditorlar  (firmalar)ning  qonun  hujjat-
larida belgilangan tartibda va shartlarda atrof tabiiy muhit holatiga salbiy 
ta’sir  ko‘rsatayotgan,  ishlab  turgan  korxonalar  va  boshqa  obyektlarni 
mustaqil ekologik ekspertiza qilishi. 
Ekologik audit xo‘jalik va boshqa xil faoliyat obyekti mulkdorining 
qaroriga binoan o‘tkaziladi. 

---

 
40
Bulardan tashqari, sohaviy, ilmiy, huquqiy, normativ va sanitariya – 
ekologik ekspertizalar ham o‘tkazilishi mumkin. 
Umuman  olganda,  ekologiya  sohasida  (davlat)  ekologik  eksperti-
zasini  o‘tkazish  va  uni  olib  borish  tabiat  boyliklari  va  inson  hayotini 
saqlashdan  iborat  bo‘lib,  davlat  ekologiya  ekspertizasining  ijobiy 
xulosasiga ega bo‘lmagan loyihalarni amalga oshirishni man etadi.