Microsoft Word bankir ziyouz com doc

www.ziyouz.com kutubxonasi 
156
— G’azabga ham kelgandi, kurashni oxiriga yetkazishga ont ham ichgandi, shundaymi? 
— Xuddi shunday. 
— Bultur partiyaviy yakdillik sari bu g‘alati da’vat e’lon qilinganida YuBTKdan bironta odam nima 
uchun qonun chiqaruvchilardan biri butun safarbarlikni barbod etishga to‘satdan jazm qilib qoldi 
degan gapni aytmaganmi? 
— Menimcha, u g‘irt mast degan yagona fikrga kelishgandi. 
— Rostdanmi? 
— Uning bay puli qo‘yayotgani kunday ravshan edi. Lekin u bu ishni bunaqa lo‘ttibozlikka yo‘l 
qo‘ymasdan ko‘p yillardan beri ado etib kelardi. 
— Yana qandaydir taxminlar bormi? 
— Biznikilardan biri unga bir dasta pul ko‘rsatganmish. 
— Shunday bo‘lishi mumkinmi? — tinib-tinchimasdi Palmer. 
— Bilasizmi, men reklama bo‘limining kichik bir odamiman, folbin emasman. 
— Men esa sizni chinakam kelt jodugari deb yurardim. 
— Faqat qorong‘i tushgandan keyin. 
— Ha. Endi esladim. 
— M-m... 
Ular jimib qolishdi. 
— Nima ham derdik, — dedi so‘ngra Palmer. U xo‘rsindi-da, juvonga qarab jilmayib qo‘ydi. — 
Kalavaning uchi qo‘limga kirdi desam bo‘laveradi. Bordi-yu, bir siltasam, xuddi ko‘zboylog‘ichning 
sehrli tayoqchasiday butun kalavani chiyratib yuboradi. 
— Marhamat, maestro. 
Yigit ichki aloqa telefoniga uzandi-da, “Elder” tugmachasini bosdi. Bir soniyadan so‘ng interkomda 
Garrining xirildoq ovozi yangradi: 
— Nima gap, Vudi? 
— Tafsilotlarni chetlab o‘tishga majburman, Garri. Kecha tilga olingan ajoyib bitim bizga dastavval 
qachon taklif etilganini ayta olasanmi? 
— Yigirma yillik... 
— Tafsilotlarsiz, — uning so‘zini bo‘ldi Palmer. 
— Ha. Yaxshi. O’ylab olishim kerak. Tag‘in kelib-kelib tong sahardan-a. 
— Tortinmay o‘ylayver. 
— O’ylayapman, o‘yladimam, — tishining orasidan dedi Elder. — Topdim. 
— Xo‘sh? 
— Bu qaysidir korxonani moliya bilan ta’minlash haqidagi muzokaralarni qayta boshlash 
munosabati bilan o‘n sakkiz oylar muqaddam sodir bo‘lgandi-yov. O’shanda, menimcha, hech kim bu 
taklifga jiddiy e’tibor bermagandi. 
— Leyn Berkxardt hammadan kam qiziqqanmidi? 
— Ayniqsa Leyn. U bu taklifni juda ham ahmoqona, bunaqasini umrimda ko‘rmaganman degandi. 
— Hamma ham bunga hazilga o‘xshagan bir narsa deb qaraganmidi? — so‘radi Palmer. 
— Faqat kechagi uzun sochli do‘stimizdan tashqari hamma. 
— Albatta. U bu bitimni hozirgi shaklida qachon taqdim qilgandi?  
— Bir yilcha avval. Balki, undan kamroqmi-ey. 
— Leyn hamon buni hazil deb yurarmidi? 
— Endi unday deb o‘ylamayotgandi, — dedi Elder. — Bundoq o‘ylab qarasaki, bu jiddiy narsa ekan. 
Jiddiyligi shunchalikki, u shartta rad etdi uni. Bunk idorasi roziligini olib, albatta. 
— Hozir bu taklif yana ko‘tarilayaptimi? 
— Barra bodringday beg‘ubor. Faqat bu gal puli ko‘proq. 
— Xo‘sh? — Palmer sukutga cho‘mdi. — Ular o‘z takliflarini yangidan barbod bo‘lishiga zamin 
tayyorlashmoqchi desa bo‘ladimi? 

---

Bankir (roman). Lesli Uoller