Microsoft Word ахборот технологиялар фанидан мажмуа doc

3. Ахборот технологиялари ва ахборот тизимлари
ўртасидаги нисбат 
Ахборот технологиялари унинг учун асосий муҳит ҳисобланадиган ахборот тизимлари 
билан узвий боғлиқдир. Бир қарашда дарсликка киритилган ахборот технологияси ва 
тизимлари тушунчаси ўзаро жуда ўхшашдек туюлиши мумкин. Лекин аслида бундай эмас. 
Ахборот технологияси компьютерларда сақланадиган маълумотлар устида мураккаблик 
даражаси турлича бўлган босқичлар, ҳаракатлар ва операцияларни бажаришнинг аниқ 
регламентланган қоидаларидан иборат бўлган жараён ҳисобланади. Ахборот технологиясининг 
асосий мақсади – дастлабки ахборотни қайта ишлаш бўйича мақсадли ҳаракатлар натижасида 
фойдаланувчи учун зарур бўлган ахборотни олишдан иборатдир. 
Ахборот тизими таркибий қисмлари компьютерлар, компьютер тармоқлари, дастурий 
маҳсулотлар, маълумотлар базаси, одамлар, алоқанинг турли техник ва дастурий воситалари ва 
ҳоказолардан иборат бўлган муҳит ҳисобланади. Ахборот тизимининг асосий мақсади – 
ахборотни сақлаш ва узатишни ташкил этиш. Ахборот тизими ахборотга ишлов беришнинг 
одам – компьютер тизимидан иборатдир. Ахборот тизимининг функцияларини унга 
йўналтирилган ахборот технологияларини билмасдан туриб амалга ошириб бўлмайди. Ахборот 
технологиялари ахборот тизими соҳасидан ташқарида ҳам мавжуд бўлиши мумкин. 
Шундай қилиб, ахборот технологияси анча кенг тушунча бўлиб, ахборот жамиятида 
ахборотни ўзгартириш жараёнлари тўғрисидаги ҳозирги замон тасаввурларини акс эттиради. 
Иккита ахборот технологиясини – бошқарув ва компьютер технологиясини оқилона қўшиб 
олиб бориш – ахборот тизими муваффақиятли ишлашининг гаровидир. 
Ахборот технологияси – ходимларнинг ахборотга компьютерда қайта ишлов бериш 
бўйича аниқ белгиланган мақсадга йўналтирилган ҳаракатлари мажмуидир. 
Ахборот тизими – компьютер ахборот технологияларидан фойдаланадиган ахборот 
маҳсулотлари ишлаб чиқариш ва қарорлар қабул қилишни қўллаб-қувватлаш учун одам–
компьютер тизими.