Mexanika mashinasozlik fakulteti texnologik mashinalar va jihozlar kafedrasi

Barabanli quritkichlar. Bunday apparatlar atmosfera bosimi bilan uzuluksiz ravishda turli sochiluvchi materiallarni quritish uchun ishlatiladi. Barabanli quritkich silindrsimon barabandan tashkil topgan boʼlib, gorizontga nisbatan kichik ogʼish burchagida (1 : 15 - 1 : 50) joylashtirilgan boʼladi. Baraban bandajlar va roliklar yordamida ushlab turilib, elektromotor va reduktor yordamida aylantiriladi. Barabanning aylanishlar soni odatda 5...8 min -1 dan ortmaydi. Nam material taʼminlagich orqali vintli qabul qiluvchi nasadkaga beriladi, bu yerda material aralashtirish taʼsirida bir oz quriydi. Soʼngra material barabanning ichki qismiga oʼtadi. Barabanning butun uzunligi boʼyicha nasadkalar joylashtiriladi. Nasadkalar barabanning kesimi boʼyicha materialni bir meʼyorda tarqatish va aralashtirishni taʼminlaydi. Bunday sharoitda material bilan qurituvchi agentning oʼzaro taʼsiri samarali boʼladi [9, 10, 11,17-23].

Baraban ichida materialning oʼta qizib ketish darajasini kamaytirish uchun material va qurituvchi agent (tutunli gazlar) bir-biriga nisbatan toʼgʼri yoʼnalishda boʼladi, chunki bunday sharoitda yuqori temperaturali issiq gazlar katta namlikka ega boʼlgan material bilan kontaktlashadi. Mayda zarrachalarning gazlar bilan ketib qolishini kamaytirish uchun barabandan soʼrib olinayotgan gazlarning tezligini ventilyator yordamida 2-3 m/s atrofida ushlab turiladi. Ishlatilgan gazlar atmosferaga chiqarilishdan oldin mayda changlardan siklonda tozalanadi. Quritilgan material barabandan tashqariga, tushiruvchi qurilma orqali chiqariladi.

Quritilayotgan material donalarining oʼlchamlari va xossalariga koʼra apparatlarda har xil nasadkalardan foydalaniladi.