Мевачилик ва сабзавотчилик

Ko‘chat qilib piyoz yetishtirish. Piyozning kechpishar navlari, ba’zan ko‘chatdan yetishtiriladi. Buning uchun piyoz urug‘i ko‘chat qilishdan bir yarim ikki oy ilgari yarim issiq parniklarga yoki ko‘chatxonalarga, har bir rom ostiga 30-40 hisobidan ivitilgan hamda nishlatilgan holda ekiladi. Maysalar parnik haroratini kunduzi 20-25 va kechasi 8-10 qilib turish hamda yagona qilish va sug‘orish yo‘li bilan parvarish qilinadi.
Ko‘chat 2-3 ta barg chiqarganda dalaga o‘tkazishga tayyor bo‘ladi. Piyoz ko‘chatlari dalaga xuddi urug‘dan o‘stirilgandagidek o‘sha muddatda va qalinlikda o‘tqaziladi, keyin qondirib sug‘oriladi.
Ko‘chat qilingan piyozlar yuqori hosil beradi, ammo ko‘p mehnat talab qilganidan, bu usul nisbatan kam qo‘llaniladi.
Barra piyoz yetishtirish. Barra piyoz - vitaminli mahsulot bo‘lgani uchun erta bahorda, xali yangi sabzavotlar yo‘q vaqtda aholini u bilan tamin-
lashning ahamiyati katta. Barra piyoz dalaga urug‘ yoki nish piyoz ekish yo‘li bilan yetishtiriladi.
Barra piyoz urug‘dan yetishtirilganda urug‘ avgust oyida, nishdan yetishtirilganda esa sentabrning oxiri oktabrda ekiladi. Piyoz kuzda ko‘karib chiqadi, qishlaydi, aprel oyida esa hosili yig‘ib olinadi.
Piyozlar pushtalarga, 30-40 sm kenglikdagi lentalarga ekiladi. Lenta orasiga urug‘ yoki mayda piyoz sochiladi va tuproq yoki chirindi bilan ko‘miladi. Yirik piyozboshlar tuproqa botirib o‘tqaziladi. Katta maydonlarda piyoz don-sabzavot seyalkasi 35-40 sm kenglikdagi lentalarga ekiladi. Bunda seyalka soshniklari bir-biriga yaqinroq (7-8 sm) o‘rnatiladi. Har gektar yerga 25-30 kg urug‘ yoki 2-4 t mayda piyozbosh ekiladi.
Piyozlar kuzda bir necha marta sug‘oriladi. Qishki sovuqlar boshlanishidan oldin esa pushtalarning ustiga chirigan go‘ng sochib mulchalanadi. Bu qishda uni sovuq urishdan saqlaydi, bahorda esa yosh o‘simliklarga oziq manbai bo‘lib xizmat qiladi.
Barra piyoz ildizi bilan sug‘urib yig‘ishtiriladi. Yaxshi parvarish qilinganda har gektar yerdan 350-400 s va undan ko‘p hosil olinadi.