Mektepke shekemgi jastaǵı balalardıń aqiliy tárbiyası Reje

Aqılıy tárbiya wazıypaları
Balalardı mektepke tayarlawda aqılıy tárbiyanıń roli úlken. Balalardıń bilimlerdi iyelep alıwları, olardıń aqılıy iskerligin rawajlandırıw, óz-betinshellilik, aqılıy ádet hám kónlikpelerdi ózlestiriwleri olardıń mektepte tabıslı oqıwı ushın tiykar bolıp xızmet etedi.
Mektepke shekemgi jastaǵı balalardı aqılıy tárbiyalawdıń tómendegi wazıypaları bar:
1. Balalarda tábiyat hám jámiyet haqqındaǵı bilimler sistemasın, ilimiy dúnya qarasın qáliplestiriw;
2. Biliwge tán ruwxıy processlerdi rawajlandırıw: sezim, qabıl etiw, yad, qıyal, oylaw, til;
3. Biliwge qızıǵıw hám aqılıy uqıplılıqlardı, aqılıy miynet mádeniyatın rawajlandırıw;
4. Aqılıy ádet hám kónlikpelerdi rawajlandırıw.
Mektepke shekemgi jastaǵı bala hár kúni ózi ushın biytanıs bolǵan nárse hám hádiyselerge dus boladı. Dógerek átiraptı baqlap, ózi ózbetinshe juwmaq shıǵarıwǵa háreket etedi.Pedagogtıń wazıypası balalardaǵı bilimlerdi bekkem túrde asırıp barıw, olardı tártipke salıw, ańıqlastırıwdan ibarat.
Bala dógerek átiraptaǵı nárseler, olardıń wazıypası, ayrım qásiyetleri: reńi, úlken-kishiligi, forması hám t.b. (sınadı, jırtıladı, tógiledi) haqqında, qanday materialdan tayarlanǵanlıǵı haqkında anıq túsinikke iye bolıwları kerek. Ol tábiyat hádiyselerin, olardıń óz-ara baylanıslılıǵın hám nızamlılıqların (jıl máwsimleriniń ózgeshelikleri, olardıń ortasındaǵı baylanıs, haywanlar, olardıń turmısı, jasawı) bilip aladı. Jansız tábiyat, ósimlikler, nasekoma hám háywanlardı baqlaw barısında tárbiyashı balalarda átirap haqqında túsiniklerin qáliplestirip baradı.
Bilimlerdi iyelep barıw nátiyjesinde balanıń shaxsı qáliplesip baradı. Bala kórkem ónerdiń túrleri esaplanǵan: súwretlew iskerligi, muzıka, ádebiyat hám t.b. haqqındaǵı túsiniklerdi iyelep baradı.
Mektepke shekemgi jastaǵı balalar ózlerine túsinikli bolǵan jámiyetlik waqıya hám hádiyseler, adamlardıń miyneti, ulıwma xalıqlıq bayramlar menen, respublikada jasaytuǵın xalıqlardıń turmısı menen tanısadı. Bul ilajlar olarda jámiyetimiz turmısına qızıǵıw oyatıwǵa, Watanǵa muxabbat hám xalıqlar doslıǵı tiykarların qáliplestiriwge járdemlesedi.