Мазкур ўқув услубий мажмуа фаннинг ишчи ўқув дастури ва ишчи ўқув режасига мувофиқ ишлаб чиқилди

Статик сток характеристикалар оиласи. Транзисторда n – канал мавжуд, яъни затвордаги кучланиш бўсағавий кучланишдан катта (U_ЗИ>U₀ ) деб ҳисоблаймиз.
n – канали индукцияланган МДЯ – транзисторнинг сток характеристикалар оиласи, яъни U_ЗИ = const бўлгандаги I_C=f(U_СИ) боғлиқлик графиги 8.6-расмда келтирилган.
U_СИ кучланишнинг канал тузилишига таъсирини кўриб чиқамиз. Агар U_СИ = 0 бўлса, ҳосил бўлган канал кенглиги канал узунлиги бўйича бир хил. U_СИ>0 бўлганда затвор ва яримўтказгич сирти орасидаги потенциаллар фарқи ва ҳаракатчан заряд ташувчиларнинг солиштирма заряди сток йўналишида камаяди. Мос равишда сток яқинида камбағаллашган қатлам қалинлиги исток яқинидагига нисбатан катта бўлиб, канал кенглиги истокдан стокка камаяди.
а) б)

8.6-расм. n – канали индукцияланган МДЯ – транзисторнинг сток (а) ва сток – затвор (б) характеристикалар оиласи.

Шундай қилиб, U_СИ кучланишнинг ортиши электронлар тезлигининг ортишига олиб келади, ток кучи дрейф тезликка пропорционал. Иккинчи томондан, U_СИ нинг ортиши каналнинг понасимонлигини ва у билан боғлиқ канал қаршилигини орттиради. Ушбу омилларнинг биргаликдаги таъсири чизиқли қонуниятга нисбатан кучсизроқ. Сток – исток кучланиш U_СИ.ТЎЙ= U_ЗИ - U₀ қийматга етганда инверс қатламнинг солиштирма заряди каналнинг сток томонида нолга тенг бўлади. Каналнинг сток томони ўзгармасдан, тўйиниш режими ҳосил бўлади.

Тўйиниш режимида сток токи амалда стокдаги кучланишга боғлиқ бўлмай қолади. Расмда штрих чизиқ билан характеристиканинг абсциссалари U_СИ =U_СИ.ТЎЙ мос нуқталари бирлаштирилган.
Сток - затвор характеристикалар оиласи. Транзисторнинг сток характеристикаларидан ташқари, унинг сток - затвор (узатиш) U_СИ = const бўлгандаги I_C = f(U_ЗИ) характеристикалари кенг ишлатилади (8.6,б-расм).
Сток – исток кучланиши U_СИ > U_СИ.ТЎЙ (тўйиниш режими) бўлганда узатиш характеристикалари (U_ЗИ - U₀)² қийматга пропорционал. 8.6,б-расмдаги пастки характеристика (U_СИ < U_СИ.ТЎЙ ) кичик кучланишга, яъни сток характеристикаларнинг тик соҳаларига (канали текис ўзгариш режимига) мос келади. Ушбу характеристика бир жинсли каналга мос келгани учун чизиқли.