Mazkur ishchi o‘quv dasturi Bioinjeneriya va oziq-ovqat xavfsizligi fakulteti Kengashining 2020 yil " " dagi yig‘ilishida muhokama qilinib, tasdiqlash uchun tavsiya etilgan.

Dala tajribasida takrorlanishlar va ularni joylashtirish. Tajriba o’tkazishda yig’ma va sochma usullardan foydalaniladi.
Yig’ma usulda: barcha takrorliklar yaxlit bitta maydonda joylashtiriladi. Ular bir-biridan faqatgina bir va ikki yarus ko’rinishida joylashganligi bilan farq qiladi.
Sochma usulda joylashtirilganda esa, takrorliklar bitta maydonning turli joylarida va hattoki, boshqa-boshqa maydonlarda joylashtirish mumkin. Himoya yo’lakchalari: variantlar o’rtasida ma’lum kenglikdagi bo’sh yer (himoya yo’lakchalari) qoldirilmasa, ma’lum muddatdan keyin variantlarga qo’llanilayotgan agrotexnika, o’g’itlash sug’orishlar bir variantdan ikkinchi variantga o’tib qolishi mumkin. Shuningdek, tajriba maydonchasining boshlang’ich quyi qismlaridan ham himoya yo’lakchalari qoldiriladi. Yo’lakchaning eni 4-5 m atrofida bo’lib, texnikaning burilishi va ekinlarni tasodifiy zararkunanda, qushlar va chorva mollarining payxon qilishidan asraydi.
Hisobga olinadigan qatorlar va o’simliklar. Tajriba variantlari 12 qatorli bo’ladigan bo’lsa, shu 12 qatordan o’rtadagi 8 qatori hisobga olinadigan va ikki chetidagi 4 tasi hisobga olinmaydigan qatorlar hisoblanadi. Dala tajribalarida hisobga olinadigan qatorlar ichida hisobga olinadigan o’simliklar tanlab olinadi va ularga yorliq (etiketka)lar osib chiqiladi. Tajriba vazifalariga, tuproqning xilma-xilligi, paykallarning katta-kichikligi va tajriba qancha davom etishiga qarab takrorlanishning zaruriy soni aniqlanadi. Sug’oriladigan sharoitlarda, doimiy (statsionar) uchastkalarda o’tkaziladigan agrotexnik tajribalarda kamida 4 marta takrorlash kerak.
Tajriba maydonchasidagi dala ishlari. Dala tajribasidagi barcha tadbirlar qisqa va belgilangan muddatlarda bajarilishi kerak. Rejalashtirilgan tadbirlar iloji boricha bir kunda bajarilsa maqsadga muvofiq bo’ladi. Agar dala ishlari yuqori saviyada amalga oshirilsa undan olinadigan ma’lumotlar natijalari haqqoniy bo’ladi. Dala tajribasi o’tkaziladigan maydonning tuproqlarini haydashga alohida e’tibor berilishi kerak. Yerlar tekis bo’lishi lozim (baland-pastlikka aslo yo’l qo’ymasligi kerak). Tajriba variantlarini o’g’itlash va sug’orishda o’g’itlar aralashib bir-biriga o’tib ketmasligi uchun juda ehtiyotkorlik bilan amalga oshirish kerak bo’ladi.
Ekish: ekishni talab darajasida o’tkazish ekish texnikasiga va urug’ning sifatiga bog’liq. Tajriba o’tkazishda ekish me’yorini urug’ning massasiga qarab emas, balki uning unuvchanlik soniga qarab belgilash kerak. Ekish bir xil chuqurlikda va bir kunda bajarilishi shart.