Mavzu: Yo’l belgilarining o’rnatilishi Reja: Yo’l belgilarining guruhlari

3.3. "mexanik transport vositalarining harakatlanishi taqiqlangan"
Barcha turdagi mexanik transport vositalarining harakatlanishini taqiqlovchi bu belgi yashil hududlar, istirohat bog’lari kabi maskanlarning ekologiyasini asrash maqsadida o’rnatiladi. Lekin bu belgining ot-arava, velosiped, moped va belgilangan yo’nalishli jamoat transport vositalari, shuningdek nogironlar boshqaradigan motokolyaska, shu hududdagi korxonalarga xizmat ko’rsatuvchi transport vositalari, yengil va yuk taksilari, shuningdek, belgi ta’siri oralig’ida yashovchilarning transport vositalariga daxli yo’q. Ushbu transport vositalari belgilangan joyga yaqin chorrahadan kirib yoki chiqib ketishlari kerak. Yo’l belgisi talabiga bo’ysunmagan haydovchilar eng kam oylik ish haqining 0,5 baravari miqdorida jarimaga tortiladi.
3.4. "Yuk avtomobillarining harakatlanishi taqiqlangan"
Bu belgi transport vositalarining to’la vazni ko’rsatilgan yoki ko’rsatilmagan shakl ko’rinishida bo’ladi. Agar belgida vazni ko’rsatilmagan bo’lsa, to’la vazni 3,5 tonnadan ortiq bo’lgan yuk avtomobillari va tizimli transport vositalari, traktorlar, o’zi yurar mashina hamda mexanizmlarning ushbu belgi o’rnatilgan yo’llarda harakatlanishi taqiqlanadi. Bu belgi bortlariga oq qiya chiziq tortilgan maxsus yuk avtomobillari, yuk taksilari, odamlarni tashiyotgan, shuningdek, shu belgi ta’sir doirasida xizmat ko’rsatayotgan yuk avtomobillarining harakatlanishini taqiqlamaydi. Eslatib o’tamiz, yo’l belgisi talabiga bo’ysunmagan haydovchilar eng kam oylik ish haqining 0,5 baravari miqdorida jarimaga tortiladi.
3.5. "Mototsikllar harakatlanishi taqiqlangan"
Yo’lning ma’lum bir qismlariga o’rnatilgan bu belgi barcha turdagi mototsikllarning harakatini taqiqlaydi, ammo u ta’sir oralig’ida yashovchi va shu hududga xizmat qiluvchi mototsikllarga daxldor emas. Serqatnov yo’llarda mototsikllarning transport vositalari harakatiga xalaqit berishining oldini olish va ortiqcha shovqindan saqlanish maqsadida ushbu yo’l belgisi o’rnatiladi. Yo’l belgisi talabiga bo’ysunmagan haydovchilar eng kam oylik ish haqining 0,5 baravari miqdorida jarimaga tortiladi.