Mavzu: tillarning paydo bo‘lishi va rivojlanishi

Tilning paydo bo‘lishi haqidagi farazlar. Tilning dastlab qaerda va qachon paydo bo‘lganligi haqida biz ilmiy asoslangan aniq ma’lumotga ega emasmiz. Tilining paydo bolishi haqida turli xil farazlar mavjud bo‘lib, ular ham munozaralidir. Bu masala qadimgi davrlardan boshlab hozirgi davrgacha shunday bo‘lib kelmoqda. Bu haqda M.Irisqulov shunday yozadi: ”Til taraqqiyotining yozuv paydo bo‘lishidan avvalgi holati biz uchun qorong‘idir. Biz faqat yozuv paydo bo‘lgandan keyingi davrda ro‘y bergan til taraqqiyoti to‘g‘risida yozma yodgorliklardan foydalanib, fikr yuritishimiz mumkin.” [M.Irisqulov, 1992: 11]. Shu sababdan ham tilning paydo bo‘lishi haqida xilma xil farazlar, qarashlar mavjud. Bu farazlarga tovushga taqlid, undov nazariyasi, mehnat chaqiriqlari, ijtimoiy kelishuv, imo-ishoralarni kiritish mumkin. Tilning paydo bo‘lishi juda murakkab jarayon bo‘lib bunda bu farazlarning deyarli hammasi qatnashgan. Bu faraz to‘g‘ri, bu faraz noto‘g‘ri deyishdan biz yiroqdamiz. Tilning paydo bo‘lishida sanab o‘tilgan omillarning barchasi ma’lum ma’noda qatnashgan. Professor N.Turniyozov: “Tilning paydo bo‘lishi muammosi nafaqat tilshunoslarni, balki antropolog, zoopsixolog, biolog, etnografiya sohalaridagi mutaxassislarni, jumladan, faylasuflarni, tarixchilarni ham qiziqtirib kelmoqda.