Mavzu: Quroldan otishning asoslari va qoidalari. 1-mashg‘ulot. Nazariy

O‘qning boshlang‘ich tezligi

Stvolning og‘iz kesimi yaqinida o‘qning harakat tezligi boshlang‘ich tezlik (V_o) deb ataladi. Stvol og‘zi tezligidan birmuncha katta va maksimal tezlikdan kichkina bo‘lgan shartli tezlik boshlang‘ich tezlik deb olinadi.

O‘q boshlang‘ich tezligining miqdori otish jadvallarida va o‘qning jangovar tavsifida ko‘rsatiladi. Boshlang‘ich tezlik qurol jangovar xossalarining muhim xususiyatlaridan biridir.

O‘qning boshlang‘ich tezligi miqdori stvolning uzunligi, o‘qning og‘irligi, porox zaryadining og‘irligi, temperaturasi va namligi, porox zarralarining shakli va o‘lchami hamda o‘qlash zichligiga bog‘liq. Stvol qancha uzun bo‘lsa, porox gazlari o‘qqa shuncha ko‘p vaqt ta`sir ko‘rsatadi va o‘qning tezligi shuncha katta bo‘ladi. Boshlang‘ich tezlik oshganida o‘qning uchish uzoqligi, to‘g‘ri otish uzoqligi, o‘qning shikast etkazuvchi va teshuvchi ta`siri ham ortadi, o‘qning uchishiga tashqi sharoitlarning ta`siri esa kamayadi.

Porox zaryadi og‘irligining o‘zgarishi porox gazlari miqdorining o‘zgarishiga, binobarin, stvol kanalida eng katta bosim miqdorining va o‘qning boshlang‘ich tezligining o‘zgarishiga olib keladi.