Мавзу: Кириш

Халқаро давлатлар кредити ёки ҳукуматлараро кредитлар у ёки бу мамлакат ҳукумати кредит муассасалари томонидан бошқа мамлакатнинг у бу тармоқларини устувор ривожлантириш мақсадида берилади. Ҳукуматлараро кредитлар хусусий кредитларга нисбатан паст фоизларда ёки имтиёзли равишда ёки умуман фоизсиз, айрим ҳолларда беғараз ёрдам сифатида ҳам берилиши мумкин.
Масалан, 2000 йилда Туркияда рўй берган зилзила оқибатларини тугатиш ва иқтисодиёт обектларини тиклаш мақсадида АҚШ «Эксимбанк»и 50 млрд. АҚШ доллари миқдорида имтиёзли кредит ажратди.
Ўзбекистонда касб-ҳунар таълимини ривожлантириш мақсадида Жанубий Корея ҳукумати республикамизга 37 млн. АҚШ доллари миқдорида, Япония ҳукумати томонидан ҳам кредитлар берди. Бундай кредитлар Европа мамлакатлари томонидан ҳам берилмоқда.


Халқаро ва минтақавий валюта-кредит ташкилотлари томонидан бериладиган кредитлар одатда, ривожланаётган мамлакатларга Узоқ муддатларга, имтиёзли шартларда, паст фоизларда аниқ мақсадларни амалга ошириш учун берилади. Бундай мақсадлар қаторига макроиқтисодий барқарорликни таъминлаш, миллий валютани мустаҳкамлаш, давлат тасарруфидан чиқариш ва хусусийлаштиришни чуқурлаштириш, кичик ва хусусий тадбиркорликни ривожлантириш, рақобатчилик муҳитини шакллантириш, кадрлар тайёрлаш дастурлари кабилар киради.
Халқаро ва минтакавий валюта-кредит ташкилотлари қаторига Халқаро валюта фонди (ХВФ), Халқаро тикланиш ва тараққиёт банки (ХТТБ ёки Жаҳон банки), Халқаро молия корпорацияси (ХМК), Осиё тараққиёт банки (ОТБ), Европа тикланиш ва тараққиёт банки (ЕТТБ) ва бошқалар киради.
Ўзбекистон Республикасининг юқоридаги халқаро ва минтақавий валюта-кредит ташкилотлар билан халқаро кредит муносабатлари тўғрисида келгуси бўлимда батафсил маълумот берилади.
Ҳозирги пайтда ривожланаётган ва муҳтож мамлакатларга халқаро кредитдан ташқари турли жамоат ташкилотлари ва фондлар томонидан беғараз ёрдам кўрсатилмоқда. Бундай ёрдам асосан соғлиқни сақлаш ва таълим тизимини ривожлантириш, экологик муаммоларни бартараф этиш ва бошқа мақсадларда берилмоқда. Бундай ташкилотлар сифатида Халқаро «Экосан» фонди, Халқаро Қизил Ҳоч ва Қизил Ярим Ой жамиятлари, ТАКИС дастури, Германиянинг К.Аденуэр ва А.Гумболт, АҚШнинг Б.Франклин ва Г.Сорос фондлари ва бошқаларни кўрсатиш мумкин.