Мавзу. Эстетиканинг замонавий муаммолари режа

18. 
    – мавзу. ЭСТЕТИКАНИНГ ЗАМОНАВИЙ МУАММОЛАРИ
    

Режа.

1. 
   Эстетик тарбия ва унинг асосий воситалари
   
2. 
   Турмуш эстетикаси
   
3. 
   Меҳнат эстетикаси ва техника эстетикасининг ўзаро боғлиқлиги
   
4. 
   Эстетиканинг замонавий муаммолари. “Оммавий маданият”нинг ёшлар эстетик дидига таъсири.
   

Таянч сўзлар: Эстетик тарбия, тарбия воситалари, турмуш эстетикаси, меҳнат эстетикаси, спорт эстетикаси, эстетик тарбияга таҳдидлар, оммавий маданият, информацион технологиялар, рекламанинг эстетик ҳусусиятлари.


1. Эстетик тарбия ва унинг асосий воситалари
Эстетик тарбиянинг асосий воситалари таркибига - санъат, информацион технологиялар, табиат, меҳнат, спорт каби соҳаларни киритиш мумкин.
Санъат - эстетик тарбиянинг муҳим воситаси. Бугунги кунда жамиятимизда инсон фаолиятини бошқариб боришдан кўра, ушбу жараённи инсоннинг ўзи ташкил этиши кераклиги бот-бот уқтирилмоқда. Бу жараёнда санъат моҳиятан шахснинг хис-туйғуларига таъсир кўрсатишга қодир бўлган муҳим восита сифатида инсонни доимо ўзига жалб этиб келган. Санъат инсоннинг эҳтирослар ва туйғулар оламига сингиб бориб уларни йиғлатади, кулдиради, ўйлашга мажбур қилади. Шунинг учун бўлса керак санъат барча даврларда инсонга ҳамроҳ бўлиб келган.
Информацион технологиялар - эстетик тарбиянинг глобал воситаси. Бир пайтлар табиий ва техника бўйича мутахассислар тайёрлайдиган олий таълим муассасалари талабаларига “Сизнинг идеалларингиз асосан қайси соҳаларда акс этади?”, деган саволга уларнинг кўпчилиги санъат, адабиёт ва маърифат соҳасида кўпроқ акс этади, деган жавоб беришгани ҳам фикрларимизни исботлайди.
Бироқ, эндиликда эстетик тарбиянинг шундай воситалари мавжудки, унинг маънавий жараёнларга кўрсатаётган глобал таъсирига бефарқ бўлиш асло мумкин эмас. Ана шундай таъсирлардан бири - бу электрон ахборот воситалардир.
Айтиш мумкинки, ахборот ва коммуникация технологияси бугунги кунда инсоний ва иқтисодий тараққиётнинг муҳим воситасига айланиши натижасида одамларнинг турмуш тарзини, ўзаро алоқасини хатто ташқи кўринишини ҳам тубдан ўзгаришига олиб келди.