Mavzu: Erkin iqtisodiy zonalarning tushunchasi,maqsadlari va turlari

III. ERKIN IQTISODIY ZONANI BOShQARISh
20-modda. Erkin iqtisodiy zonaning boshqaruv organlari
Erkin iqtisodiy zonaning faoliyati Ma’muriy kengash tomonidan muvofiqlashtiriladi.
Erkin iqtisodiy zona direksiyasi (bundan buyon matnda direksiya deb yuritiladi) erkin iqtisodiy zonaning operativ boshqaruv organidir.
(20-modda O‘zbekiston Respublikasining 2009-yil 23-sentabrdagi O‘RQ-224-sonli Qonuni tahririda— O‘R QHT, 2009-y., 39-son, 424-modda)
21-modda. Erkin iqtisodiy zonaning Ma’muriy kengashi
Ma’muriy kengash O‘zbekiston Respublikasi Vazirlar Mahkamasi tomonidan tuziladi.
Ma’muriy kengashga rais boshchilik qiladi. Erkin iqtisodiy zonaning chegaralari O‘zbekiston Respublikasining ma’muriy-hududiy birligi (tuman, shahar, shahardagi tuman) chegarasiga to‘g‘ri kelgan taqdirda, Ma’muriy kengash raisining vazifalarini ijro etish tegishli hokim zimmasiga yuklanadi.
(21-modda O‘zbekiston Respublikasining 2009-yil 23-sentabrdagi O‘RQ-224-sonli Qonuni tahririda— O‘R QHT, 2009-y., 39-son, 424-modda)
22-modda. Erkin iqtisodiy zona Ma’muriy kengashining vakolatlari
Ma’muriy kengash:
alohida huquqiy tartibotga rioya etilishi ustidan nazoratni amalga oshiradi;
erkin iqtisodiy zonani rivojlantirish dasturini ishlab chiqadi;
erkin iqtisodiy zonada joylashtirish uchun investorlar tanlovini amalga oshiradi;
erkin iqtisodiy zonaning faoliyat ko‘rsatishi bilan bog‘liq masalalar bo‘yicha davlat boshqaruvi organlarining, mahalliy davlat hokimiyati organlarining faoliyatini muvofiqlashtiradi;
erkin iqtisodiy zonaga investitsiyalarni jalb etish uchun qo‘shimcha shartlar belgilaydi;
erkin iqtisodiy zonaning har yilgi budjetini ko‘rib chiqadi va tasdiqlaydi.
Ma’muriy kengash qonun hujjatlariga muvofiq boshqa vakolatlarni ham amalga oshirishi mumkin.
Ma’muriy kengashning o‘z vakolati doirasida qabul qilgan qarorlari erkin iqtisodiy zona hududidagi xo‘jalik faoliyati qatnashchilari (yuridik va jismoniy shaxslar) ijro etishi uchun majburiydir.
(22-modda O‘zbekiston Respublikasining 2009-yil 23-sentabrdagi O‘RQ-224-sonli Qonuni tahririda— O‘R QHT, 2009-y., 39-son, 424-modda)