Mavzu: baliq va baliq mahsulotlari, ularning kimyoviy tarkibi, ozuqaviy qiymati, baliqdan taomlar tayorlash usullari

Sovutilgan baliq. Baliqlar 0-2°C haroratgacha sovutiladi. Sovutish uchun yirik baliqlar idishga qatorlab, maydalari esa taxlab qo‘yiladi va maydalangan muz sepiladi. Ortib - jo‘natish vaqtida idishdagi muzning miqdori baliq og‘irligining 50% idan kam bo‘lmasligi lozim. Sovutilgan baliqlarda tabiiy ta’mi va xushbo‘ylik xususiyatlari saqlanadi.

Tozalash usuliga ko‘ra baliqlar tozalanmagan, kallasi qirqilib va qirqilmasdan ichak-chavog‘i tozalangan xillarga bo‘linadi. Baliqning sifati uning tashqi ko‘rinishi, jabrasining holati, go‘shtining konsistentsiyasi, hidi, tozalash usuliga ko‘ra belgilanadi.

Sovutilgan sarxil baliqlarning ko‘zi bo‘rtgan, tiniq, ravshan va tarang bo‘ladi; jabralari och qizil; konsistentsiyasi zich, qayishqoq, umurtqasi qizarmagan yoki qoraymagan; tangachalari toza, butun, to‘kilmagan; shillig‘i tiniq; hidi yangi baliqlarga xos va to‘g‘ri tozalangan bo‘lishi kerak. Tashqi ko‘rinishi shikastlangan, qontalash va jabra qopqoqchalari qizargan, qorni shishgan baliqlar savdoga chiqarilmaydi.

Sovutilgan baliqlar hajmi 80 kg gacha bo‘lgan yog‘och yashiklarga va hajmi 250 l gacha bo‘lgan bochkalarga joylanadi. Sovutilgan baliqlarni 0-2°C haroratda va havoning nisbiy namligini 90% dan kam qilmay saqlagan ma’qkul Saqlash muddati - ko‘pi bilan ikki sutka.