Mavzu: Axborotli olam muammolari va Internet Darsning ta’limiy maqsadi

Mavzu: Axborotli olam muammolari va Internet
Darsning ta’limiy maqsadi:

O‘quvchilarga Internet va unda axborotlarni aks ettirish imkoniyatlari haqida ma’lumot berish.

Darsning tarbiyaviy maqsadi:

O‘quvchilarni bilimga chanqoqlik ruhida tarbiyalash.

Darsning rivojlantiruvchi maqsadi:

O‘quvchilarni axborot texnologiyalari imkoniyatlari haqidagi tasavvurlarini kengaytirish.

Asosiy tushunchalar:

Internet, protokol, WWW, Web-sahifa, gipermatn, Web-sayt, Web-server, URL adres, provayder.

Mavzuni boshlashga hozirlik:

Informatika darsligi va plakatlar, tarqatma materiallar tayyorlab qo‘yiladi. Mavzuga mos elektron qo‘llanmalar kompyuterga yuklab ishchi holatga keltiriladi.

Darsda qo‘llash mumkin bo‘lgan uslub: aqliy hujum, to‘rli usul, klaster, hamma-hammaga o‘rgatadi.

Mavzuni yoritish:

Mavzu Internet (International Network - xalqaro kompyuter tarmog’i) tarixi haqida ma’lumot berish bilan boshlanadi.

Internet “sovuq urush” mahsuli hisoblanadi. Uni yaratilishiga yadro zarbalaridan qisman zararlanganda ham ishlay olishga mo‘ljallangan tajribaviy aloqa sistemasi sifatida XX asrning 70-yillari boshlarida AQSH Mudofaa Vazirligi tomonidan ishlab chiqilgan ARPANet aloqa tarmog‘i asos bo‘lgan. ARPANet - buzilgan aloqa bo‘g‘inlarni avtomatik ravishda aylanib o‘tishga va tarmoqdagi kompyuterlarning ma’lumot almashishiga imkon yaratuvchi kommunikatsiyalar paketidir.

ARPANet tarmog‘i birinchi marta ishga tushirilganda 4 ta kompyuter orasida maxsus kabel orqali bor yo‘g‘i 2 minut davomida axborot almashinilgan. Avvaliga bu tarmoq maxfiy hisoblangan. Keyinchalik, modem va telefon tarmog‘i orqali axborot almashish imkoniyati yuzaga kelgandan so‘ng bu tarmoqqa turli korxona va tashkilotlar ulanib olgan. Shu tariqa bu tarmoq Internet tarmog‘iga aylangan. Internet tarmog‘i biror tashkilotga bo‘ysunmaydi, lekin davlatlar, ilmiy va ta’lim tashkilotlari, kommersiya strukturasi va millionlab xususiy shaxslar tomonidan moliyalashtiriladi. Tarmoq taklif etilgan ko‘ngillilar tomonidan tashkil etilgan “Internet arxitekturasi bo‘yicha kengash” tomonidan boshqariladi.