Масъул муҳаррир: академик Т. Н. Долимов, г м. ф д., проф. Тақризчилар

16-расм. Кометанинг фотосурати.
Кометанинг думи куёш нури таъсирида ядродан учиб чиқадиган газ молекулалари (ионлари) ва чанг зарраларидан таркиб топган бўлиб, узунлиги ўнлаб миллион километрларга етиши мумкин.
Кометалар қуёш шамоли мавжудлигидан дарак беради. Галлей кометаси - тарихий комета. Эрамиздан аввалга 240 йилдан бошлаб унинг 30 марта Қуёшга яқинлашганлиги кузатилган. Ҳар 75-76 йилда бир марта қайтиб кўринади. 1986 йили кометани бешта сайёралараро космик аппаратлар: «Вега-1», «Вега2» (СССР), «Джотто» (ЕИҲ), «Суисен» ва «Сакигаке» (Япония) кутиб олишган. Уларнинг баъзилари кометанинг боши орқали ўтишган. Галлей кометаси яна 2061 йилда кўринади.
Уэста кометаси - асримизнинг энг чиройли кометаси ҳисобланади. У Қуёш нурларида булутни эслатувчи узун кенг думга эга. Боши Венера сингари ёруғ бўлган. У бир неча қисмларга парчаланиб кетган.
Шумейкер-Леви кометаси. 1992 й. комета Юпитернинг булутли қопламасидан 15 минг км узоқдан ўтган. Натижада унинг ядроси 17 бўлакка парчаланиб, 200 минг км га тарқалиб кетган. Шу тариқа комета Маунт Паломар обсерваториясида Южин Шумейкер ва Дэвид Леви томонидан кашф этилган.
Метеорлар ва метеоритлар. Осмондан тушадиган тошлар ёки темир парчалари метеоритлар дейилади. Ерга уларнинг тушишини ҳар биримиз кузатишимиз мумкин. Об-ҳаво тоза бўлган кечада юлдузлар осмонида тез-тез учиб ўтаётган оловли чизиқлар кузатилади.
Сайёрамизни ўраб турган фазода турли ўлчамдаги қаттиқ жисмлар ҳаракатланади. Уларнинг ўлчами қанча катта бўлса, шунча кам учрайди.
Массаси кичик бўлган бундай жисмлар катта тезликда ер атмосферасига кириб, ҳаво билан ишқаланиши туфайли жуда қизиб кетади ва 80-100 км баландликда бутунлай ёниб кетади. Булар метеорлардир. Агар атмосферага йирикроқ осмон жисмлари кириб келса, атмосфера тормоз сифатида унинг космик тезлигини пасайтиради ва ер юзасига тушади. Булар метеоритлардир. Ер юзасига метеорит тушганда кучли зарба таъсиридан ботиқлик - кратер ҳосил бўлади. Бунда осмонга чанг-тўзон кўтарилиб, кучли товуш эшитилади.
Метеоритлар темирли, тошли ва темиртошли учта синфга бўлинади. Темирли метеоритлар асосан никелли темирдан таркиб топган. Ердаги тоғ жинсларида никелли темир қотишмаси табиий ҳолда учрамайди, шунинг учун ҳам темир таркибида никел бўлиши, унинг космик келиб чиқишидан далолат беради.
Тошли метеоритларнинг бош минераллари силикатлар (оливинлар ва пироксенлар) ҳисобланади. Тошли метеоритларнинг асосий тури бўлган хондритларнинг характерли хусусияти бўлиб, ичида думалоқ ҳосиланинг - хондрнинг мавжудлигидир (17-расм). Хондрлар ҳам метеоритни ташкил этган моддалардан иборат, аммо кесмада алоҳида донадан иборатлиги кўриниб туради. Уларнинг келиб чиқиши ҳозиргача номаълум.
Темиртошли метеоритлар - тошли минералларга эга бўлган никелли темир бўлакларидир.