Машғулотдан кўзланган мақсад

Машғулотдан кўзланган мақсад:

• 
  Кимё дарси ва унга қўйилган замонавий талаблар, дидактик, психологик ва методик талабларининг шарҳи.
  
• 
  Дарс шакллари, дарс турлари.
  
• 
  Ҳар бир дарс турларига мос келган дарс босқичларини таҳлил қилиш.
  

Машғулотга доир назарий материал
Кимё дарси ва унга қўйилган дидактик, психологик ва методик талаблар
Таълим-тарбия тизимининг бугунги кундаги асосий вазифаси ўқувчиларни Ватанимизни севадиган, ўз билими ва истеъдодига суянадиган ҳамда мустақил равишда замонавий ахборот-коммуникация технологияларидан фойдаланган ҳолда билим оладиган қилиб тарбиялашдан иборат. Мазкур вазифалар самарали дарслар орқали амалга оширилади.
Таълим-тарбиянинг бирламчи асоси дарс ҳисобланади. Дарснинг дастлабки кўринишлари бундан 400 йил аввал пайдо бўлган. Таълим-тарбия берувчиларнинг вазифаси давлат томонидан тасдиқланган ўқув дастури асосида дарсни ташкил этиш ва ўқув-мавзу режада кўрсатилган билимларни таълим олувчиларга дидактиканинг барча тамойилларидан келиб чиқиб, бир қатор педагогик усуллардан ва ўқитишнинг техник воситаларидан фойдаланиб етказиб беришдан иборат.
Дарс - бу синфда аниқ ўқув мақсадларига эришиш учун белгиланган (одатда 45 минут) вақт оралиғида ўқитувчи раҳбарлигида ўқувчилар билан олиб бориладиган, мазмуни мантиқан бутун ва яхлит бўлган асосий таълим-тарбия жараёнидир.
Дарснинг мақсади, мазмуни, тури ва унга ажратилган вақт Давлат таълим стандартлари (ўқув дастури ва режа ҳамда дарслик) асосида белгиланади. Ўқитувчи учун дарс ўқув ишларининг асосий ташкилий шакли экан, у бу жараёнда:

• 
  ҳар бир синфда ўқувчиларнинг ёши ва билим даражаси бир хил бўлишига;
  
• 
  дарс қатъий жадвал бўйича белгиланган аниқ муддатда олиб борилишига;
  
• 
  дарс ўқитувчи раҳбарлигида бутун синф билан ва алоҳида ўқувчилар билан ишлаш шаклида олиб борилишига;
  
• 
  дарс ўқув фанининг характери, ўтилаётган материалнинг мазмунига қараб турли усулда ва воситалар ёрдамида олиб борилишига ва узлуксиз таълим тизимининг бир қисми сифатида тугалланган билим берилишига ва навбатдаги билимларни ўзлаштириш учун замин яратишга қатъий риоя қилиши шарт.
  

Дарс таълимнинг асосий шакли экан, у илмий, тизимли, тушунарли, ўқувчининг шахсий хусусиятлари эътиборга олинган ҳолда ташкил этилиши шарт.