Toshkent. Chilonzor dahasi. Dastlabki turar-joy kvartallari loyihasi, 1956-1957 yy. Arxitektorlar O. Gaazenkopf, I. Demchinskaya, O. Rushkovskiy va b.
Toshkent. Markaziy loyihaviy tumanning №1 va 2 kichik tumanlarini qurish loyihasi, 1967 y. Arxitektorlar V. Ginzburg, Yu. Raninskiy, A. Rogachev, inj. V. Xandji va b. Mosproekt-1. 1 – turar uylar; 2 – bolalar muassasalari, maktablar va har kun foydalaniladigan madaniy-maishiy xizmat ko’rsatish muassasalari hududlari; 3 – sport qurilmalari; 4 – umumiy foydalanishga mo’ljallangan ko’kalamzorlar; 5 – suv qurilmalari; 6 – mikrorayon tarkibiga kirmaydigan hududlar chegarasi.
Toshkent. Kichik tuman Ts-7. Maket fotosi, 1966 y. Arxitektorlar L. Guseva, I. Dikareva, V. Medvedev, V. Uspenskiy, inj. I. Kshirel va b.
Kichik tuman qurilishining eskizi. Toshkent. a) ko’kalamzorlar sxemasi;
Kichik tumanni eng kichik tarkibiy element sifatida aholisining soni 4-6 ming dan ortiq bo’lgan barcha aholi yashash joylarida shakllantirish mumkin. Aholisining soni 15 ming kishidan kam bo’lgan kichik shaharlarda turar-joy tumanini tashkil qilish imkoniyati yo’qdir. Bunday shahar markazida aholi har kuni, kunaro va epizodik foydalanadigan barcha xizmat ko’rsatish tashkilotlari mujassamlashadi. Shaharlar aholisi sonining ortib borishi bilan ularda turar-joy tumanlarini tashkil qilish imkoniyati ham ortib boradi. Aholisining soni 50 ming kishidan iborat bo’lgan shaharda bir nechta kichik tumanni o’z ichiga olgan bitta turar-joy tumanini tashkil qilish mumkin. Bunday turar-joy tumanining markazi shahar markazi bilan birlashib ketadi. Aholisi 50 ming kishidan ortiq bo’lgan shaharlarda bir nechta turar-joy tumani va aholida shahar markazi vujudga keladi.
Turar-joy tumanlari va kichik tumanlarning funktsional-rejaviy tuzilishini shakllantirishga ta’sir qiluvchi omillar. Turar-joy tumanlari va kichik tumanlarni shakllantirishning umumiy tamoyillari turli tabiiy-iqlim sharoitidagi shaharlar uchun o’z kuchini saqlaydi. Shu bilan bir qatorda, O’zbekistonning ayrim tumanlari, viloyatlari o’ziga xos tabiiy-iqlim, demografik, ijtimoiy turmush xususiyatlariga egadir va ularni turar-joy tumanlarini shakllantirishda hisobga olish maqsadga muvofiqdir. Bunday xususiyatlarni hisobga olish aholi uchun yanada qulayroq yashash sharoitini yaratishga, turli viloyatlarda o’ziga xos bo’lgan turar-joy qurilishini shakllantirishga yordam beradi.
Aholi demografik tarkibida maktabgacha va maktab yoshidagi bolalar sonining ko’p bo’lishi turar-joy binolari va jamoat binolarining qurilishiga ta’sir ko’rsatadi. Bu bolalar bog’chalari va umumta’lim maktablaridagi o’rinlarning sonini oshirishni taqozo etadi. Bu o’z navbatida turar-joy tumani va kichik tumanlardagi turar-joy binolar sahni zichligining kamayishiga olib keladi.
O’zbekiston o’zining geografik joylashishi bo’yicha qadimdan odamlar o’zlashtirgan vohalarni, qumliklarni va tog’li erlarni o’z ichiga oladi. Bundan tashqari kontinental iqlimga egadir. Bularning hammasi aholiga qulay yashash sharoiti yaratish uchun turli tadbirlarni ko’zda tutishni taqozo etadi.
Tabiiy-iqlimiy sharoitlar. Respublikamizda yozning issiq kunlari 5-6 oy, o’ta issiq davri esa 2-4 oy davom etadi. Bunday davrlarda yashash uchun noqulay bo’lgan sharoit vujudga keladi. Bunday davrlarda aholi turmush jarayonlarning bir qismi salqin joylarda, ochiq havoda o’tkaziladi. Shu tufayli turar-joy tumanlari va kichik tumanlarni shakllantirishda aholi turmush tarzining ana shu o’ziga xos tomonlarini hisobga olish zarurdir.
Quyosh radiatsiyasining kuchliligi, havoning quruqligi va haroratining yuqoriligi, yoz oylarida deyarli yog’ingarchilik bo’lmasligi turar-joy tumanlari va kichik tumanlarni ko’kalamzorlashtirish va obodonlashtirish bo’yicha maxsus tadbirlar qurishini taqozo etadi. Bulardan tashqari Respublikamiz hududlari turli shamol sharoitlari bilan ham farqlanadi, ya’ni ba’zi viloyatlarda shamol tezligi kam bo’lsa, ba’zi tumanlarda kuchli shamol esadi. Bu esa aholi yashash joylarini shamollatish tadbirlarini qurishni, ayrim hollarda shamoldan asrash choralarini qurishni talab qiladi.
Muhandislik-qurilish sharoitlari nuqtai nazaridan O’zbekiston avvalo yuqori seysmik zonaga kiradi, zamini esa ko’p erlarda cho’kuvchan hisoblanadi. Shahar aholisining 80 %i seysmik tumanlarda joylashgan. Yuqori seysmik sharoit asosan bino qismlariga katta talablar qo’yiladi. Shu bilan bir qatorda turar-joy binolarining balandligini kamaytirish kabi shaharsozlik talablarini hal qiladi.
Hozirgi vaqtda shaharsozlik sharoitlarining eng muhimi, bu O’zbekiston shaharlarining kengayishi uchun zahira hududlarining cheklanganligidir. Shaharlarning kengayishi hozirgi kunda qimmatbaho qishloq ho’jaligi erlar hisobiga yuz bermoqda.
Shaharlarning kengayishi uchun erlarning etishmasligi shaharlar aholisi tez ko’payayotgan bir sharoitda shahar hududlaridan, jumladan turar-joy tumanlari va kichik tumanlar hududlaridan foydalanish samaradorligini oshirish va ularni tejashni muhim shaharsozlik muammosiga aylantiradi.
O’zbekistonning tabiiy-iqlim, demografik, muhandislik qurilish va boshqa o’ziga hos sharoitlari turar-joy tumanlari va kichik tumanlarning funktsional-rejaviy tuzilishiga kuchli ta’sir ko’rsatuvchi omillar hisoblanadi.
