Marketing tadqiqotlari

Marketing tadqiqotlari tahlili maqsadlari

Marketing tadqiqotlarida tahlil bu – to‘plangan va tegishli tarzda guruhlangan, strukturalangan va qayta ishlangan axborotdan xulosa olish jarayoni, ya’ni marketing tadqiqotining natijasidir. Marketing tahlili bozor holati va rivojlanishi qonuniyatlari va tendensiyalarini tavsiflashi, marketing faoliyatida ma’qul keladigan risk darajasini baholashi, ilmiy asosda boshqaruv harakatlarini amalga oshirishi, bozor jarayonlarini tartibga solish uchun asos yaratishi ko‘zda tutilgan. Marketing tahlili firma/korxona va butun tarmoq strategiyasini ishlab chiqish uchun shart-sharoitlar yaratadi. Tovar bozori tahlili firmaning atrof-muhit bilan o‘zaro aloqalar tizimini aniqlaydi, bozorning marketing tadbirlariga reaksiyasini baholaydi.

Marketing tahlili – statistik, ekonometrik va boshqa tadqiqot usullari yordamida firmaning innovatsion va savdo faoliyati hamda tovar bozori jarayonlari va hodisalarini baholash, tushuntirish, modellashtirish va bashorat qilishdir.

Marketing tadqiqotida tahliliy faoliyatning turli ko‘lami (miqyos)lari ajratib ko‘rsatiladi. Tezkor miqyosda tahlil qoidaga ko‘ra, bozor vaziyatining joriy kon’yunktura baholaridan, qisqa muddatli dastlabki axborotdan boshlanadi. Bozordagi tezkor vaziyat xaqida tahliliy axborot o‘z imkoniyatlarini va kutilayotgan raqobatchilar harakatlarini joriy ob’ektiv baholash uchun zarur.

Firma/korxona marketingini boshqarish bo‘yicha zarur choralarni zudlik bilan ko‘rish mumkin bo‘lishi uchun tezkor tahlil shoshilinch, kechiktirib bo‘lmaydigan bo‘lishi lozim. Vaqt yetishmasligi qaysidir ma’noda tadqiqot metodologiyasini

belgilab beradi: eng sodda tahlil usullari, taxminiy baholar, norasmiy tavsiflar foydalaniladi. Bunday tahlil, avvalo, birlamchi navbatdagi, eng sezilarli kamchiliklarni bartaraf etib, batafsil tadqiqotni keyinga qoldirish mumkin bo‘lgan shoshilinch vazifalarni hal qiladi. Bu tahlil nisbatan kichik vaqt oralig‘ini o‘z ichiga oladigan tezkor tahlil deb ataladi. U kon’yunktura xarakteriga ega bo‘ladi.