Magistr akademik darajasini olish uchun yozilgan dissertatsiya

III.2. Didaktik materiallarni takomillashtirish metodikasi asosida
o‘tkazilgan tajriba-sinov ishlari tahlili va tavsiyalar
Boshlang‘ich ta’lim jarayonida didaktik materiallardan foydalanish holatini o‘rganish va didaktik materiallardan foydalanishni takomillashtirishga doir ishlab chiqilgan metodikani sinovdan o‘tkazish maqsadida Qarshi shahridagi 7-umumiy o‘rta ta’lim maktabida va Qarshi tumanidagi - umumiy o‘rta ta’lim maktabida tajriba-sinov ishlarini amalga oshirdik. Tajriba–sinov ishlari davomida 24 nafar boshlang‘ich sinf o‘qituvchilari bilan anketa so‘rovlari o‘tkazdik, 18 soat dars mashg‘ulotlarini kuzatdik.
Kuzatishlarimiz natijasida boshlang‘ich sinflarda didaktik materiallardan foydalanishning amaliyotdagi ahvolini o‘rgandik. Boshlang‘ich sinf o‘qituvchilari kichik maktab yoshidagi o‘quvchilarning yosh psixologik xususiyatlaridan kelib chiqib ular tafakkurini o‘stirish va dunyoqarashini kengaytirish maqsadida ko‘rgazmali qurollardan keng foydalanishlarini, ammo o‘qituvchilar o‘z ustilarida ishlash va mahoratlarini o‘stirishda boshqa qo‘llanmalardan talab darajasida foydalanmasliklari ayon bo‘ldi.
Boshlang‘ich sinf o‘qituvchilarining didaktik materiallardan foydalanish darajalarini so‘rovlar natijasida aniqladik va uni diagrammada ifoydalaymiz.
Dastlab, boshlang‘ich sinf o‘qituvchilarining birlamchi didaktik materiallar, ya’ni darslik, elektron darslik hamda o‘quv qo‘llanmalardan foydalanish darajalarini aniqladik. Darsliklar, nafaqat o‘quvchilar, balki boshlang‘ich sinf o‘qituvchilari uchun ham muhim manba vazifasini o‘taydi (100%). Shuningdek, o‘quv qo‘llanmalardan ham ko‘pgina o‘qituvchilar foydalanadilar (45,9 %). Ammo zamonaviy didaktik material bo‘lmish elektron darsliklar hali boshlang‘ich ta’lim metodikasiga chuqur kirib kelmaganligini kuzatishimiz mumkin. Atigi 5% boshlang‘ich sinf o‘qituvchisigina ushbu didaktik materialdan foydalanishlari ma’lum bo‘ldi.

58

3.2.1-chizma