М. М. Мусаев компьютер тизимлари ва тармоқлари

10Base-2 стандарти. 10Base-2 стандартида узатувчи муҳит сифатида ингичка Ethernet коаксиал кабелдан фойдаланилади. Такрорловчисиз сегментнинг максимал узунлиги 185 метрни ташкил қилиб, сегмент охирида 50 Омли терминатор қўйилади. Ингичка коаксиал кабель шовқиндан яхши ҳимояланмаган, механик жиҳатдан мустаҳкам эмас ва бир мунча тор ўтказувчан йўлакка эга.
Станция кабелга юқори частотали уч тармоқли (яъни бир тармоғи тармоқ адаптери билан қолган икки тармоғи эса кабелларга уланадиган) Т-коннектор ёрдамида уланади. Битта сегментга уланувчи максимал сегментлар сони – 30 та. Станциялар орасидаги энг кам масофа 1 м. бўлиб, кабелнинг ҳар 1 метрига боғламаларни улаш учун махсус белги қўйилади.
10 Base-2 стандартида 5-4-3 қоидаси бўйича такрорловчилардан фойдаланиш мумкин. Бунда тармоқ 5х185 = 925 м. максимал узунликка эга бўлади. Бу чеклов Ethernet стан­дартининг 2500 м. чекловидан анча кучли ҳисобланади. Ethernet тармоғининг қоидаси бўйича 1024 тадан ортиқ боғлама бўлмаслиги керак, 10Base-2 стандарти эса сегментга уланувчи станцияларни 30 тага, юкламали сегментлар сонини 3 тага чеклайди. Шунинг учун ҳам 10Base-2 тармоғида боғламалар сони 29х3 = 87 тадан ошмаслиги зарур.
10Base-2 стандарти 10Base-5 стандартига жуда яқин ҳисобланади, фақат унда трансиверлар тармоқ адаптери билан бирлаштирилган. Бунда ингичка коаксиал кабель компьютер шассисига уланган тармоқ адаптерининг чиқиш разъёмигача боради. Ушбу ҳолатда тармоқ адаптерида «осилиб» туради, бу эса компьютерларни физик жиҳатдан жойини ўзгартиришни қийинлаштиради. 10Base-2F стандарт тармоғининг одатдаги битта кабель сегментидан иборат таркиби 5.10-расмда кўрсатилган.
Бундай стандартни амалиётга тадбиқ қилиш кабелли тармоқ учун оддий ечим ҳисобланиб, тармоққа компьютерни улаш учун тармоқ адаптери, Т-коннектор ва 50 Ом қаршиликдан иборат терминатор керак бўлади. Кабелли боғланишнинг бундай тури авария ва бузилишларга мойиллиги кучли бўлади. Ингичка кабель йўғон кабелга нисбатан шовқинни қабул қилувчанлик хусусияти юқори ҳисобланади. Моноканалда кўп механик боғланишлар бўлади, бунда: ҳар бир Т-коннектор учта механик боғланишни бериб, шундан иккитаси тармоқ ҳаёти учун муҳим аҳамиятга эга. Фойдаланувчилар мурожаатлари разъёмлар орқали кира олиши мумкин. Бу эса моноканал тўлиқлилигини бузади.

10Base-5 ва 10Base-2 стандартларининг умумий камчилиги - моноканалнинг ҳолати ҳақидаги оператив ахборотнинг мавжуд эмаслигида. Бундай тармоқларда кабель шикастлангани дарҳол аниқланади (тармоқ ишламай қолади), лекин шикастланган кабелни топиш учун махсус қурилма – кабель тестери керак бўлади.