М. М. Мусаев компьютер тизимлари ва тармоқлари

Динамик топологияли тизимларнинг улаш элементлари.
Топологиянинг бу тури кўп босқичли топология бўлгани учун, бундай тизимларнинг улаш босқичларида қўлланиладиган улаш элементларининг турини аниқлаб олиш керак. Тизим бу аломатига қараб икки гуруҳга бўлинади:

• 
  кесишувчи коммутация асосидаги тизимлар;
  
• 
  таянч коммутация элементлари асосидаги тизимлар.
  

Биринчи гуруҳдаги тармоқларда таянч улаш элементи сифатида nxm коммутаторлари қўлланилади. Иккинчи гуруҳда улаш элементининг вазифасини 2x2 тўлиқ коммутатор бажаради. Бундай коммутатор потенциал тўрт разрядлик иккилик коди билан бошқарилади ва уланишнинг 16 та вариантини таъминлайди, шундан 12 тасини фойдали деб ҳисоблаш мумкин. Одатда, амалда 2x2 коммутаторнинг икки разрядли бошқариш коди билан аниқланадиган фақат тўртта ҳолатидан фойдаланилади (1.9,в-расм). Бундай коммутатор таянч коммутациялаш элементи (ТКЭ) деб аталади. ТКЭнинг биринчи иккита ҳолати асосий бўлиб ҳисобланади: уларда кириш ахбороти чиқишда тўғридан – тўғри ёки кесишган бўлиб узатилади. Кейинги иккита ҳолати кенг эшиттиришли иш тартиби учун мўлжалланган, бунда хабар битта боғламадан бир вақтнинг ўзида унга уланган қолган ҳамма боғламаларга узатилади. Кенг эшиттиришли режим камдан – кам ишлатилади. Аниқ ҳолатга ТКЭни ўчириб – ёқиш учун сигналлар бошқариш қурилмаси билан шакллантирилади. ТКЭнинг нисбатан мураккаб вариантларида бу сигналлар кириш хабарларининг таркибида бўлган белгиланган нуқтанинг манзилидан келиб чиқиб, элементни ўзининг ичида шакллантирилади.

Ҳисоблаш тизимининг қолган топологиялари нисбатан мураккаб бўлиб, уларда алоқа алмашишнинг мураккаб алгоритмларидан фойдаланиладиган коммутациялаш элементлари қўлланилади. Бу топологиялар – Баньян, Омега, Дельта.

II БОБ. Компьютер ахборот тизимларининг асоси

ЭҲМ, компьютер – бу ҳисоблаш ва ахборот масалаларини ечишда ахборотларга автоматик ишлов бериш учун мўлжалланган аппарат воситаларининг мажмуасидир. Компьютерларнинг турли синфларга бўлинишлари маълум, биз вазифаси ва яратилиш босқичлари бўйича синфларга бўлинишини кўриб чиқамиз.

Вазифаси бўйича компьютерлар учта универсал (умумий қўлланишдаги), муаммога йўналтирилган ва махсуслаштирилган гуруҳларга бўлинади.
Универсал компьютерлар мураккаб ишлов бериш алгоритмлари ва катта ҳажмли маълумотларни сиғиши бўйича ажралиб турадиган турли кўринишлардаги иқтисодий, математик, муҳандислик техник ва ахборот масалаларни ечиш учун мўлжалланган. Булар катта сиғимли хотира, турли ташқи қурилмалар ва қувватли дастурий таъминотли юқори иш унумдорлилигига эга бўлган умумий фойдаланиладиган машиналардир.
Муаммога йўналтирилган компьютерлар объектларни бошқариш ва назорат қилиш масалаларни ечиш учун хизмат қилади. Улар объект билан қўшимча алоқа воситаларига эга ва параметрларни ўлчаш, уларни қайд этиш, объектлар ёки жараёнлар ҳақидаги ахборотларни тўплаш ва ишлов бериш вазифаларини бажаради. Улар чекланган аппарат ва дастурий ресурсларга эга ҳамда етарлича тор синфлардаги масалаларни ечади.
Махсуслаштирилган компьютерлар тор доиралардаги масалаларни ечиш учун ишлайди ва чекланган функционал имкониятларга эга. Улар дастлаб переферия қурилмалари, мураккаб бўлмаган агрегатлар, транспорт, ўлчаш аппаратураларни бошқариш бўйича, маълумотларни узатиш тизимлари, бошқариш ва ҳисоблаш тизимларнинг боғламалар ва блокларни мослаштириш ва уйғунлаштириш бўйича аниқ ҳаракатларга дастурлаштирилади.
Ўзининг ривожланиши ва такомиллашиш вақтида компьютерлар элементлар базаси (электровакуум асбоблар, ярим ўтказгичли элементлар, кичик, ўрта ва катта интеграл микросхемалар), тезкор ишлаши (секундига юзлаб, минглаб, миллионлаб ва юз миллионлаб операциялар), дастурий таъминотнинг мураккаблиги билан ажралиб турадиган бир неча босқичларни (авлодларни) босиб ўтади.
Замонавий компьютерлар алгоритмларни амалга оширишда бутунлай параллеллаштирилиш, тақсимланган кўп процессорли структура, ҳисоблашларни векторли ва матрицали тезлатгичларнинг тезкор хотираси турли кўринишли архитектурага эга.