М а р к е т и н г асосий маркетинг тушунчалари ва замонавий сўзларининг қисқача изоҳли луғати

МАРКЕТИНГ СТРАТЕГИЯСИ ҲАҚИДА
Маркетинг стратегияси – бу фирма салоҳияти ва имкониятларини таҳлил қилиш, мақсадларини аниқлаб олиш, маркетинг режасини ишлаб чиқиш, маркетинг чора-тадбирларини амалга ошириш ва уларни амалга оширишни назорат қилиш жараёнидир.
Маркетинг стратегияси асосини бешта стратегик концепция ташкил этади.

1. 
   Бозор сегментацияси.
   
2. 
   Мақсадли бозорни танлаб олиш.
   

3. Бозорга кириш услубларини танлаш (яъни, бошқа фирмалар акцияларини сотиб олиш, фақат ўзининг салоҳиятини қўллаб ёки бошқа фирмалар билан ҳамкорлик қилган ҳолда амалга оширилади).
4. Маркетинг элементларини танлаш (мижозга товар сотиш ёки хизмат кўрсатиш, сотиш жойи, товар ёки хизматни бозорга силжитиш ва нархлар).
5. Фирманинг бозорга кириш вақтини танлаш (ишлаб чиқариш ёки хизмат кўрсатиш қувватларини ташкил этиш, мамлакат иқтисодиётидаги аҳвол, асосий рақобатчиларнинг бозордаги позицияси ва ҳоказолар).

АУТСОРСИНГ НИМА?
Ҳар қандай корхона унча кўп бўлмаган соҳаларда кучли бўлиши мумкин. Қолган соҳаларга эса ўзига нисбатан бу ишни яхши қиладиганларни ёллаши керак. Дастлабки пайтларда аутсорсинг корхоналарнинг қўшимча ишларида, яъни офисларни тозалаш ёки ҳудудларни кўкаламзорлаштириш ишларида фойдаланилар эди. Бугунги кунда эса, корхоналар ўзига нисбатан яхши ёки арзон қиладиган ишларни субпудратчи корхоналарга топширмоқдалар. Масалан, Nike компанияси ўзининг пойафзал ишлаб чиқаришидан воз кечиб, маҳсулотининг таннархи паст ва сифати юқори бўлган Осиё давлатларидаги пойафзал фабрикалари билан шартномалар тузган. Демак, аутсорсинг – бу корхона ўзининг кучсиз соҳаларини ўзига нисбатан яхши, сифатли ва арзон қиладиган субпудратчи корхоналарга шартнома асосида беришидир.
ТОВАР ЁКИ ХИЗМАТ ҲАҚИДА
Товар – бу эҳтиёж ёки муҳтожликни қондира оладиган ҳамда бозорга эътиборни тортиш, сотиб олиш, ишлатиш ёки истеъмол қилиш мақсадида таклиф этилган барча нарсалардир.
Товарларни умуман иккига бўлиш қабул қилинган, яъни:
- истеъмол қилишга (шахсий фойдаланишга)мўлжалланган;
- ишлаб чиқариш учун мўлжалланган (ишлаб чиқариш воситалари).
Истеъмол қилиш(шахсий фойдаланиш)га мўлжалланган товарлар уч гуруҳга бўлинади:
а) узоқ муддатли фойдаланиладиган буюмлар –бунга автомобиллар, музлатгичлар, мебеллар ва ҳоказолар, яъни нисбатан кам сотиб олинадиган буюмлар киради.
б) қисқа муддатли фойдаланиладиган буюмлар –бунга озиқ-овқат маҳсулотлари, кир ювиш воситалари ва ҳоказолар, яъни тез-тез харид қилинадиган буюмлар киради.
в) хизматлар –шахсларнинг ҳаракати натижасида бирор-бир маҳсулот яратиш ёки фойдаланиладиган бирор-бир самара –бунга якка буюртма асосида кийимлар тикиш, қўлёзма матнини компьютерда териш, самолётда йўловчиларни ташиш ва ҳоказолар киради.