M. A. Hamrayev d. A. Muhamedova d. X. Shodmonqulova

Morfologik tamoyil. Bu tamoyilga ko`ra so`zlar va ularning tarkibiy qismlari talaffuz qilinishiga qarab emas, asliga muvofiq yoziladi. Masalan: 1) maktab, kitob, borib, kelib, yuzlab, kuylab, ozod, obod kabi so`zlarning oxiridagi b va d undoshlari p va t tarzida aytilsa ham, asliga muvofiq b va d yoziladi; 2) bog‘bon, kaptarboz kabi so`zlar tarkibidagi yasovchilardan b undoshi v tarzida aytilsa-da, asliga muvofiq b yoziladi; 3) shanba, manba, sunbul kabi so`zlar tarkibidagi n undoshi m tarzida aytilsa ham, asliga muvofiq n yoziladi; 4) do‘st, past, sust, farzand, xursand kabi so`zlarda yonma-yon kelgan undoshlarning oxirgisi talaffuz qilinmaydi, ammo yozuvda saqlanadi.
Morfologik tamoyil orfografiyaning yetakchi tamoyili sanaladi.
Etimologik-an`anaviy tamoyil. Bu tamoyilga ko`ra, boshqa tillardan (masalan, arab, rus yoki rus tili orqali boshqa tillardan) o`zlashgan so`zlar hozir ham o`tmishdagi shakliga muvofiq yoki o`zi mansub bo`lgan tildagi shaklini o`zbek imlosida ham saqlagan holda yoziladi. Masalan: 1) muomala, muhokama, munosabat kabi so`zlar arab tilidan o`zlashgan bo`lib, ularning uchinchi bo`g`inidagi a unlisi i tarzida aytiladi, ammo yozuvda etimologik-an`anaviy shaklini
saqlaydi; 2) ocherk, tonna, kosmos, pochta kabi so`zlarning urg`uli bo`g`inidagi o unlisi o`zbekcha o’ tarzida aytilsa ham, rus tilidagi shakliga mos ravishda o yoziladi. 3) samolyot, kometa, morfema, direktor, traktor kabi so`zlarning urg`usiz bo`g`inidagi o unlisi a yoki i tarzida aytilsa ham, rus tilidagi shakliga muvofiq ravishda o tarzida yoziladi; 4) televizor, telefon, gerbariy kabi ruscha–baynalminal so`zlarning urg`usiz bo`g`inlarida kelgan e unlisi i tarzida talaffuz qilinadi, lekin rus tilidagi shakliga mos ravishda e saqlanadi.