M. A. Hamrayev d. A. Muhamedova d. X. Shodmonqulova

Agglutinativ tillar – har bir grammatik ma'no alohida qo`shimcha bilan ifodalanigan tillardir: maktabga – jo`nalish ma'nosini ifodalaydi, maktablar – ko`plik ma'nosini ifodalaydi. Bunday tillarga turkiy tillar, mo`g`ul, yapon, ugor-fin tillari kiradi.

Affiks – q. Qo`shimcha.

Affiksatsiya usuli – so`z yasovchi qo`shimchalar yordamida so`z yasash: oqla, o`tkir, zargar, eskicha.
Ajratilgan bo`lak – gap tarkibida boshqa bolaklardan mazmun va ohang jihatidan pauza bilan (yozuvda tinish belgilari bilan) ajratilgan bo`lakdir: Qarshidagi daraxtga tirmashib, telefon simini qirquvchi qora choponli bir yigitni — do'sti O'rozni ko'rdi...(O.)
Ajratilgan hol – o`zidan oldin kelgan holni izohlaydigan yoki kengaygan shaklda boshqa bo`laklardan pauza bilan ajratilgan holdir: Pastda, soy bo'yida tegirmon novlardan quyilgan suvning bir maromda shovillashi eshitildi.(O.Y.) Yo'lchi tishini qayrab, boyvachchaning ko'kragiga zarb bilan bir musht tushirdi.(O.)
Ajratilgan qaratqich aniqlovchi – o`zidan oldingi aniqlovchini izohlab keladigan aniqlovchidir: Ukasining, ya‘ni Komiljonning ishlari yurishib ketdi.
Alfavit (alifbo) - harflarning ma'lum tartibda joylashgan majmui.
Allofon – fonemaning real borliqda talaffuz qilinadigan va quloq yordamida eshitiladigan ko`rinishidir.
Alohida guruh so`zlar – lug`aviy ma'no bildirmaydigan (ya'ni, so`roqqa javob bo`lmaydigan), morfologik jihatdan o`zgarmaydigan (ya'ni, qo`shimcha olmaydigan), lеkin ba'zan gap bo`lagi vazifasini bajara oladigan so`zlardir: modal so‘zlar, undov so‘zlar, taqlid so‘zlar.
Amorf tillar – tarkibidagi so`zlar o`zaro hech qanday qo`shimchalarsiz, ohang yordamida yoki yordamchi so`zlar orqali bog`lanadigan tillardir: qadimgi xitoy tili.
Aniq otlar - insonning 5 ta sеzgi a'zosi (ko`rish, eshitish, ta'm bilish, hid bilish va tеri orqali sеzish) yordamida sеzish mumkin bo`lgan narsalarni bildiruvchi otlar: qalam, tovush, hid, havo.