Loyiha matni 49901-(61999)

project.gov.uz
06.06.2022
182
VII BOʻLIM. TADBIRKORLIK SUBYEKTLARINING HUQUQLARINI HIMOYA QILISH
SHAKLLARI VA USULLARI
29-bob. Tadbirkorlik subyektlarining huquqlarini himoya qilish
365-modda. Tadbirkorlik subyektlarining huquqlarini himoya qilish shakllari
Tadbirkorlik subyektlari oʻz huquqlari, erkinliklari va qonuniy manfaatlarini sud orqali himoya
qilish huquqiga ega.
Tadbirkorlik subyektlarining buzilgan yoki nizoli huquqlarini himoya qilish qonunchilik
hujjatlariga muvofiq talabnoma bildirish, mediatsiya, xalqaro arbitraj va boshqa usullar orqali amalga
oshirilishi mumkin.
Tadbirkorlik subyektlari davlat organlari va boshqa organlarning qonunga xilof qarorlari, ular
mansabdor shaxslarining qonunga xilof harakatlari (harakatsizligi) ustidan oʻz xohishiga koʻra boʻysunuv
tartibida yuqori turuvchi organga yoki mansabdor shaxsga yoxud bevosita sudga shikoyat qilish huquqiga
ega.
Boʻysunuv tartibida yuqori turuvchi organga yoki mansabdor shaxsga shikoyat berilganligi
shunday shikoyatni sudga berish huquqini istisno etmaydi.
366-modda. Tadbirkorlik subyektlarining nizolarini sudgacha hal qilish
Huquqlari va qonuniy manfaatlari buzilgan tadbirkorlik subyektlari ushbu huquqlarni buzgan
shaxslarga nizoni hal etish uchun qonunchilik hujjatlarida belgilangan tartibda talabnoma bilan murojaat
qilishi mumkin.
367-modda. Mediatsiyani qoʻllash orqali huquqlarni himoya qilish
Tadbirkorlik subyektlari oʻrtasida mediatsiyani qoʻllash toʻgʻrisidagi kelishuv shartnomadagi
uning tarkibiy qismi boʻlgan shart tarzida yoki alohida kelishuv tarzida yozma shaklda tuziladi.
Mediatsiyani oʻtkazish Oʻzbekiston Respublikasining “Mediatsiya toʻgʻrisida”gi Qonuniga
muvofiq amalga oshiriladi.
368-modda. Tadbirkorlik subyektining ishchanlik obroʻsini himoya qilish
Tadbirkorlik subyekti oʻz ishchanlik obroʻsiga putur yetkazadigan maʼlumotlarga, agar bunday
maʼlumotlarni tarqatgan shaxs ularning haqiqatga toʻgʻri kelishini isbotlay olmasa, raddiya berilishini sud
tartibida talab qilishga haqli.

---