Loyiha matni 49901-(61999)

383-modda. Tadbirkorlik subyektlarining tadbirkorlik sohasidagi qonunchilikni buzganlik
uchun javobgarligidagi kafolatlar
Tadbirkorlik subyektlariga nisbatan koʻriladigan huquqiy taʼsir choralar majburiy talablarni
buzilishining xususiyati, qonun bilan qoʻriqlanadigan moddiy va nomoddiy boyliklarga yetkazilgan yoki
yetkazilishi mumkin boʻlgan ziyonga (zararga) mutanosib boʻlishi lozim.
Tadbirkorlik subyekti tomonidan tadbirkorlik toʻgʻrisidagi qonunchilikni buzganlik uchun
qonunchilikda subyektning oʻziga nisbatan moliyaviy javobgarlik hamda uning mansabdor shaxsiga
maʼmuriy javobgarlik belgilangan hollarda faqat tadbirkorlik subyektiga nisbatan moliyaviy
javobgarlikka tortish koʻrinishidagi huquqiy taʼsir chorasi qoʻllaniladi.
Tadbirkorlik subyektlari uchun javobgarlik belgilovchi huquqiy normalar faqatgina qonunlar
bilan oʻrnatiladi.
384-modda. Tadbirkorlik subyektlarining tadbirkorlik sohasidagi qonunchilikni buzganlik
uchun javobgarligi
Tadbirkorlik subyekti tomonidan sotilgan (ishlab chiqarilgan) tovar (ish, xizmat) isteʼmolchining
hayoti, sogʻligʻi va mol-mulki uchun mutlaqo xavfsiz boʻlishi, muvofiqlik sertifikatlariga, shuningdek
zarur isteʼmol xossalari haqida toʻliq va ishonchli maʼlumotga ega boʻlishi kerak. Isteʼmolchilar bilan
hisob-kitoblar isteʼmolchiga kassa yoki tovar chekini majburiy bergan holda Oʻzbekiston Respublikasi
qonunchiligiga toʻliq rioya qilingan holda amalga oshirilishi kerak.
Mazkur talablar hamda majburiy talablar reyestrida nazarda tutilgan boshqa talablar buzilgan
taqdirda tadbirkorlik subyekti Oʻzbekiston Respublikasi qonunlariga muvofiq javobgarlikka tortiladi.
385-modda. Narx va tariflarni tartibga solish sohasidagi qonunchilik hujjatlari talablarini
buzganlik uchun javobgarlik
Narx va tariflarni tartibga solish sohasidagi qonunchilik hujjatlari talablarini buzgan tadbirkorlik
subyektlariga ortiqcha olingan mablagʻlarning yarmi miqdorda jarima solinadi.
Narx va tariflarni tartibga solish sohasidagi qonunchilik hujjatlari talablarini buzganlik holatini
mustaqil aniqlagan va buning natijasida ortiqcha mablagʻlar olgan tadbirkorlik subyekti ushbu
mablagʻlarni olti oy muddatda isteʼmolchilarga qaytargan yoxud isteʼmolchilarni aniqlash mumkin
boʻlmagan taqdirda Oʻzbekiston Respublikasi respublika byudjetiga oʻtkazib berganda, unga nisbatan
javobgarlik choralari qoʻllanilmaydi.

---