Лицей ўқувчилари билан учрашув қизғин ўтди

Лицей ўқувчилари билан учрашув қизғин ўтди
Жиноят ишлари бўйича Қибрай туман суди раиси томонидан навбатдаги учрашув Ўзбекистон Республикаси ИИВ 1-сонли академик лицей биносида ташкил этилди. Бу бежизга эмас. Ҳозирда суд тизимида ишлаётган судьялар ва суд аппарати ходимлари тизимида хизмат олиб бораётган кўплаб ходимлар айнан ИИВ Академиясини битиришган бўлиб, ўз навбатида академик лицейда таҳсил олаётган бўлажак ҳуқуқшунослар ҳам айнан ушбу олий ўқув юртига ўқишга кириш мақсадида таҳсил олишмоқда.
Тадбир аввалида лицей ўқувчиларга суд-ҳуқуқ тизимида амалга оширилаётган ислоҳотлар, шу жумладан Конституциявий ислоҳотлар, қонунчиликка киритилаётган ўзгартириш ва қўшимчалар, суд тизимига жорий қилинаётган ахборот-коммуникация технологиялари, судьяларга қўйилган талаблар, суд муҳокамасини олиб бориш жараёни ва тартиби, исбот қилишда далилларни тўплаш, ҳамда тизимдаги сўнгги янгиликлар ҳақида батафсил ахборот ва тушунтиришлар берилди.
Шундан сўнг ўқувчилар билан очиқ мулоқот ва ўзаро савол-жавоблар қизғин тус олди. Судлар томонидан жиноят содир этган шахсга жазо тайинлашда эътибор бериладиган ҳолатлар, жиноятларни оғирлик даражасини фарқлаш, жазо тизими ва бошқа бир қатор йўналишларда берган саволларидан кўриндики, ўқувчиларда суд соҳасига бўлган қизиқиш юқори.
Аммо, қизиқишнинг ўзи етарли эмас. Судья бўлиш учун олий юридик маълумотга эга бўлиш билан бир қаторда, муайян ёшга тўлган, судьялар олий мактабини битирган, аввало юксак одоб-аҳлоқ билан бир қаторда пухта билим ва албатта жисмонан соғлом бўлиш талаб этилади.
Бир сўз билан айтганда, бу каби тадбирлар ёшларни сўнгги янгиликлардан, ислоҳотлардан чуқурроқ хабардор бўлишлари, суд-ҳуқуқ тизими соҳасига қизиқтириш билан бир қаторда, улар орасидан юксак билимли ва интеллектуал ёшларни саралаб, келгусида тизимга жалб қилишга ҳам хизмат қилади.
С.Дусманов
Жиноят ишлари бўйича
Қибрай туман суди раиси