Қўлёзма ҳуқуқида (575. 16)

1.3-расм. Минтақавий ривожланишнинг таркибий сиёсати асосий унсурлари³⁸
1.3-расмдан кўриш мумкинки, таркибий сиёсат барча субъектларининг манфаатларини инобатга олган ҳолда кенгайтириш керак. Яъни, таркибий сиёсатни ишлаб чиқиш ва амалга оширишда субъектлар таркибига таълим муассасалари, технопарклар, касаба уюшмалари ва кенг аҳоли оммасини киритиш тавсия этилади, чунки иқтисодиётдаги таркибий ўзгартиришларни аҳоли манфаатларини эътиборга олмаган ҳолда амалга ошириш мумкин эмас. Бунда, субъектларни кенгайтирилган таркибининг ўзаро таъсири шерикчилик ва келишувчилик тамойилларига асосланиши керак. Шу билан бирга, минтақа таркибий сиёсатининг объекти сифатида саноат тармоқлари, ҳудудий бирлашишлар, тармоқлараро мажмуалар ва корхоналар қаралиши керак. Минтақа таркибий сиёсати объектларининг ушбу кўринишда такомиллаштиришлик таркибий ўзгаришларга тизимли ёндашувни таъминлайди.
Минтақавий иқтисодиёт ўзининг очиқлиги билан ажралиб туради. Бу хусусият минтақавий бозорлар: товар, молия, меҳнат, туризм, ахборот ва бошқа бозорларнинг ўзаро боғлиқлигини кўрсатади. Минтақавий иқтисодиёт умуммамлакат миқёсида шаклланаётган ва ривожланаётган ягона бозор тизимининг ажралмас қисми бўлиб, марказий ва тармоқлар (тармоқлараро) бошқарувида ўзига хос ўринга эга.
Минтақа иқтисодиёти очиқ, нотекис динамик ривожланувчи тизим бўлиб, унга маҳаллий ва умумдавлат ўзгаришлари хос бўлади. Минтақавий таркибий ўзгаришлар минтақа хўжалик тизимининг секторлари, соҳалари, сегментлари, тармоқлари, ҳудудий ишлаб чиқариш мажмуалари (кластерлар), ва иқтисодий зоналар нисбатлари ва чегараларининг ўзгаришларидан иборат. Минтақавий иқтисодиётда таркибий ўзгаришларнинг манбаи ижтимоий ҳудудий меҳнат тақсимотидир, у минтақа иқтисодиётининг таркиби ва уларнинг ўзаро алоқаларини ўз ичига олади.
Шундай қилиб, таркибий ўзгаришларни минтақавий даражада давлат томонидан тартибга солишнинг асосий вазифаси уларнинг институционал, технологик, қайта ишлаб чиқариш ва инфратузилмавий жиҳатдан мувозанатлашувини таъминлаш ҳисобланади.
Минтақа иқтисодиётининг таркибий ўзгартиришларини такомиллаштириш учун унга инновацион ёндашувларни қўллаш ва у бўйича ривожланган хорижий мамлакатларнинг илғор тажрибаларини ўрганиш керак бўлади.