Лаборатория машғулоти №

Лаборатория машғулоти № 9
Мавзу: Эритроцитлар сонини Горяев камераси ёрдамида санаш. Қон айланиш тизимининг морфофункционал хусусиятлари. Қон томирлари деворининг тузилиши. Артериал босим ва пульсни аниқлаш тажриба: Қон томирлари деворининг тузилишини ўрганиш.


9.1-тажриба: Эритроцитлар сонини Горяев камераси ёрдамида санаш.
Ишдан мақсад. Горяевнинг ҳисоб камераси билан танишиш. Одамнинг 1 мм³ қонидаги эритроцитлар, лейкоцитлар ва тромбоцитлар сонини аниқлаш.
Керакли жиҳозлар. Микроскоп, Горяэвнинг ҳисоб камераси, силлиқланган қоплағич ойна, эритроцитлар ва лейкоцитларни санаш учун аралаштиргичлар, скарификатор, суюлтирувчи эритмалар учун 50 мл ли иккита стакан, ош тузининг 3 % ли эритмаси, метилин кўки билан бўялган сирка кислотанинг 5 % ли эритмаси, тромбоцитларни ҳисоблашда қонни суюлтириш учун эритма (3,8 г натрий ситрат, 0,53 г ош тузи, 0,15 г метилин кўки 100 мл дистиллаган сувга солиниб қайнатилади, совитилиб филтрланади, унга 2-3 томчи формалин қўшилади), спирт, эфир, пахта томпони.
Назарий тушунча. Эритроцитлар ўзида қон пигменти – гемоглабин сақлайдиган ҳужайралар. Одам эритроцитлари ядросиз, ўртаси ботиқ диск шаклида бўлади. Уларнинг диаметри 7 мкм бўлиб, кислород ва карбонат ангидрид газларини ташиш вазифасини бажаради. Қоннинг шаклли элементлари Горяевнинг ҳисоб камераси ёрдамида микроскоп остида саналади. Қоннинг шаклли элементларини ҳисоблаш учун қўлланиладиган асбоб аралаштиргич ҳисоб камерасидан иборат. Аралаштиргичнинг ўрта қисми ампуласимон кенгайган, капилляр қисми бўлимларга бўлинган найчалардир. Эритроцитларни ҳисоблашда қўлланиладиган аралаштиргичда 0,5, 1,0 ва 101 бўлимлар бор. Лейкоцитлар учун қўлланиладиган аралаштиргичда эса 0,5, 1,0 ва 11 бўлимлар бор. Аралаштиргичларнинг кенгайган қисмида мунчоқ бўлиб, у қон яхши аралашиши учун хизмат қилади.
Горяевнинг ҳисоб камераси қалин ойна бўлиб, ўрта қисми ариқчалар билан майдончаларга бўлинган. Марказий майдонча ёнидаги майдончалардан 0,1 м паст бўлади. Бу майдонча кўндаланг ариқча орқали иккига бўлинган. Уларнинг ҳар бирида 225 та катта квадратдан иборат катаклар чизилган, ҳар бир катта квадрат 16 та кичик квадратдан иборат. битта кичик квадратнинг сатҳи 1/400 мм², ҳажми эса 1/4000 мм² га тенг.