Laboratoriya jumıs №1

Timusqa baylanıslı antigenler. Ko`pshilik antigenler immun reakciyalardı tek g`ana timusqa baylanıslı limfotsitler ja`rdeminde ju`zege shıg`ara aladı, sol sebebli olardı timusqa baylanıslı antigenler dep ataladı. Korpuskulyar antigen, belok ha`m viruslar sonday antigenler toparına kiredi. Sonın` menen bir qatarda, immun juwaptın` rawajlanıwında T-kletkalar qatnaspaytug`ın antigenlerde bar. Bular ko`binshe polimerler bolıp, olarg`a bakteriyalardın` quramındag`ı lipopolisaxarid, polisaxaridler mısal bola aladı. Bunday timusqa baylanıslı bolmag`an antigenler V-limfotsitlerdi aktivlestiriw qabılyayatına yie.. Bunnan tısqarı, immun juwapta olarg`a qarsı tek IgM islep shıg`arıladı.
Mikroorganizmlerdin` antigenleri. Bir mikroorganizmde bir neshe tu`rli, tu`rge ha`m tipke ta`n antigenler boladı. Tipke ta`n antigenler boyınsha bakteriyalar bir neshe serologiyalıq va-riantlarg`a bo`linedi. Bakteriya kletkasında somatik-O, qamshılı-N, kapsulalı - K, ekzo- ha`m endotoksin quramına kiretug`ın ha`m protektiv antigenler bar ekenligi anıqlang`an.
Somatik O-antigen, tiykarınan gramteris bakteriyalar kletka diywalındag`ı glikolipidlerde (LPS-lipopolisaxaridte) yamasa endotoksinnın` polisaxarid bo`liminde jaylasqan. O-antigen ıssılıqqa shıdamlı, 100ºS da qızdırılg`anda 1-2 saatqa shıdamlı, formalin, etanol ta`sirinde parshalanbaydı.
Ha`reketshen` bakteriyalardın` qamshısında belok tabiatlı (flagelinnen du`zilgen) N-antigen bar. Temperaturag`a shıdamsız, 56-80ºS qızdırılg`anda parshalanadı, fenol ta`sirinde bolsa, o`z antigenlik qa`siyetin saqlap qaladı. Haywanlardı tiri kul`tura menen emlegende, O- ha`m N-antigenlerge qarsı antitelolar payda boladı, eger ol qaynatılıp keyin immunlansa, tek g`ana O-antigenge qarsı antitelolar payda boladı. O-antigenler mikroorganizmlerdin` toparg`a ta`n arnawlılıg`ın ta`minleydi.
Bakteriyalar kapsulasında quramı glikoproteiddan ibarat K-antigen bar. Ol kapsula ha`m kletka diywalında jaylasqan. Quramında, uron kislotali polisaxaridler (glyukuron, galakturon ha`m basqalar) boladı. Temperanın` ta`sirine ko`re A-, V-, M-, L-tu`rlerine iye. L-, V-tu`rleri temperaturag`a shıdamsız, V-antigeni 60ºS qızdırılsa 1 saatqa shıdamlı; L-antigen 60ºS ta parshalanadı, A-, M-antigenlar temperaturag`a shıdamlı, 100ºS da eki saatqa shıdaydı.
K-antigen mikrob kletkasında O-antigennen joqarıaqta jaylasıp onı jawıp, sol sebebli, ekpe 100ºS da qızdırılsa K-antigen parshalanadı ha`m sonnan keyin O-antigennin anıqlaw mu`mkin boladı.
Kapsuladan K-antigennen basqa Vi-antigenide ajıratıp alıng`an. Bul antigen qarın tifi keselligi qozg`atıwshısına uqsagan joqarı virulentli enterobakteriyalardan ajıratıp alıng`anı ushın virulentlik antigen dep ataladı. Kapsula antigenleri, sal`monella, esherixiy, pnevmakokk, klebsiella, sibir` jarası batsillalarına uqsag`an kapsula payda etiwshi mikroblarda jaqsı u`yrenilgen. Kapsula antigeni boyınsha mikrob shtammları serovarlarg`a ajıratıladı.
Bakteriyalardın` belok tabiatlı toksinleri, fermentleri ha`m basqa patogenlik faktorlarıda antigenlik qa`siyetke iye.
Sibir` jarası, oba (chuma), ko`kjo`tel, brutsellyoz, tulyaremiyag`a uqsag`an keselliklerdin` qozg`atıwshıları xojayın organizmine tu`skennen son` protektiv antigen (ingl.protective – qorg`aw) payda qılıwı anıqlang`an, bul antigenler mikroblardın` turaqlı du`zilmesi esaplanbaydı.