Курсни тугатиш иши

I боб. Мактабгача таълим ташкилотларида маънавий тарбияни амалга ошириш талаблари
1.1 Маънавий тарбия ва унинг мактабгача таълим
ташкилотларидаги ўрни
Маънавият- арабча сўз бўлиб, аҳлоқий ҳолат, хусусиятлар деган маънони билдириб, инсон руҳий ва ақлий омилини ифодаловчи тушунча. Бу тушунча кишиларнинг фалсафий, ҳуқуқий,илмий-бадиий, ахлоқий, диний тасаввурларини ўз ичига олади. Маънавият атамасининг асосида “маъно” сўзи ётади. Маълумки инсоннинг ташқи ва ички олами мавжуд. Ташқи оламга унинг бўй- басти, кўриниши, кийиниши, ҳатти-ҳаракати ва бошқалар киради. Ички олами эса унинг яшашдан мақсади, фикр юритиши, орзу интилишлари, ҳис туйғуларини ўз ичига олади. Инсоннинг ана шу ички олами маънавиятдир. Маънавият - маърифат ва маданият билан боғлиқ. Маънавият одамларда тап-тайёр ҳолда вужудга келмайди. Унга мустақил ўқиш, ўрганиш, тажриба орттириш орқали эришилади. Маънавият қанчалик бойиб борса, жамият ва миллат шунчалик равнақ топади.
Мамлакатимизда ёшларда Ватанга садоқат, тадбиркорлик, иродалилик, мафкуравий иммунитет, меҳр-оқибатлилик, масъулиятлилик, бағрикенглик, ҳуқуқий маданият, инновацион фикрлаш, меҳнатсеварлик каби муҳим фазилатларни болаликдан бошлаб босқичма-босқич шакллантириш мақсадида 2019 йил 31 декабрда Ўзбекистон Республикаси Вазирлар Маҳкамасининг “Узлуксиз маънавий тарбия концепциясини тасдиқлаш ва уни амалга ошириш чора-тадбирлари тўғрисида”ги 1059-сон қарори қабул қилинди. Концепцияда маънавий тарбияни шакллантиришда мактабгача таълим ташкилотининг амалга оширадиган вазифаларга алоҳида эътибор қаратилган.

Узлуксиз маънавий тарбия концепциясида мактабгача таълим тизимида маънавий тарбияни амалга оширишда 3-7 ёшли болаларга хос хусусиятлар, жумладан:

• ўз туйғуларини бошқариш кўникмаларининг ривожланиши;
• ўз хатти-ҳаракатларини ахлоқий бошқариш кўникмани юзага келиши;
• шахсий фазилатлар асосларининг пайдо бўлиши;
• миллий анъаналарга қизиқишнинг пайдо бўлиши;
• ўзига-ўзи баҳо бериш, теварак-атрофдагиларга маънавий-ахлоқий муносабатнинг пайдо бўлиши;
• бола фаолиятининг етакчи турлари – мулоқот, ўйинлар, машғулотлар;
• нутқ асосида маънавият асосларининг ривожланиши инобатга олинади.