Кредит-модуль тизимида талабаларнинг мустақил ишларини ташкил этиш ва назорат қилиш технологияси

ЎЗБЕКИСТОН РЕСПУБЛИКАСИ ОЛИЙ ВА ЎРТА МАХСУС ТАЪЛИМ ВАЗИРЛИГИ АНДИЖОН МАШИНАСОЗЛИК ИНСТИТУТИ

«КРЕДИТ-МОДУЛЬ ТИЗИМИДА ТАЛАБАЛАРНИНГ МУСТАҚИЛ ИШЛАРИНИ ТАШКИЛ ЭТИШ ВА НАЗОРАТ ҚИЛИШ ТЕХНОЛОГИЯСИ» МАВЗУСИДАГИ МАХОРАТ ДАРСИ

Бош илмий-методик марказ тингловчиси М.Юсупов

Режа:

Талабаларнинг мустақил иши ва уни ташкил этиш
Талабанинг мустақил ишининг сифатли бажарилишини таъминлаш
Талабаларнинг фан бўйича мустақил ишларни бажаришларини назорат қилиш

Мавзунинг асосланиши ва унинг долзарблиги:

Кредит-модул ўқитиш тизимига ўтиш олий ўқув юрти профессор-ўқитувчиларига бўлган мажбурият ҳамда талабни ҳам оширади. Модулли ўқитиш тизими билан ўқитувчи нафақат ахборот берувчи ва назорат қилувчи функцияларини, балки маслаҳатчи ҳамда мувофиқлаштирувчилик вазифаларини ҳам бажаради. Педагогик жараёнда ўқитувчининг етакчилик роли сақлаб қолинади. Таълимнинг кредит технологиясини жорий этиш самарадорлиги ва сифатини таъминлаш учун кредит технологиялари, стандартлари, ўқув режалари, лавозим тавсифлари, ўқув курсларининг мазмунини танлаш тамойиллари, ўқитишнинг принциплари ва усуллари, ўқув жараёни, талабалар мустақил иши кредит тизими бўйича ташкил этишнинг қонунчилик базасини ишлаб чиқиш зарур. Шу жиҳатдан ҳам ишда қўйилган масала ҳозирги кундаги муҳим аҳамият касб этувчи масалалардан ҳисобланади. Булардан ташқари мавзуни ўқитишда интерфаол усулларни қўллаш таълим бериш сифати ва самарадорлигини сезиларли даражада оширади.

Кириш

Кредить-модуль тизими дунёнинг илғор мамлакатлари олий таълим тизимида кенг қўлланилаётган тизимдир. Ушбу таълим тизимининг ўзига хос хусусиятларидан бири ўқув жараёнида асосий эътибор талабаларнинг мустақил ишлашига қаратилганлигидир. Талабаларнинг мустақил ишларини ташкил этиш, ўқув-услубий таъминотини шакллантириш ва такомиллаштириб бориш, “ўқитувчи-талаба” механизмини доимий ҳаракатини таъминлаш муҳим аҳамиятга эга. Ушбу кредит модуль тизимида талабаларнинг мустақил ишларини ташкил этиш ва назоратини амалга ошириш, мавжуд муаммолар ва уларнинг ечимлари бўйича таклифлар берилади.