Kostum va moda tarixi

5.2. ARAB DAVLATLARI KOSTUMI TARIXI
VII asrda tarqalgan islom dini jahonda arab-islom 
madaniyatining vujudga kelishi va tarqalishida katta rol o‘ynadi. 
Arabiston yarim oroli, Shimoliy Afrika, Markaziy Osiyo va 
Kavkazorti davlatlari hududini o‘z ichiga olgan Arab xalifaligi 
davlati «Arab davlatlari san’ati»ning o‘ziga xos tarzda umumiy 
va milliy xususiyatlarini shakllantirdi. Bugungi kunda Arab 
davlatlari san’ati deganda Arabiston, Iroq, Suriya, Falastin, 
Misr, Tunis, Marokash, Jazoir, shuningdek, arab xalifaligi 
hududlariga kirgan Ispaniyaning janubiy hududlari tushuniladi. 
Arab davlatlari san’atida me’morchilik alohida ajralib turadi. 
Islom dini tarqalishi bilan masjidlar, maqbaralarning qurilishiga, 
ularning bezaklariga e’tibor qaratildi. Gumbaz tipidagi 
me’moriy obidalar, minoralarning qurilishi rivojlandi. Masjid 
interyerlari dastlab ikki qator yarim ustunlar bilan ajratilgan. 
Ustunlar aylana shaklidagi gumbazga tutashgan bo‘lib, o‘ziga 
xos fazoviy kenglikni hosil qilgan, mehrob qismi o‘ziga xos 
arabiy naqshlar bilan bezalgan holda qurilgan.