Kitapxana com сайтындағы барлық китаплар тек танысыў ретинде берилген. Китаплар

СОҢ КӨЛДЕ
Бермес едим он көлге, 
Көл ийеси мен болсам, 
Көл сулыўы Соң көлде 
Мен болсам да сен болсаң. 
Таң атқанда оянсаң, 
Көл суўына шомылсаң, 
Аққуўдай боп тарансаң, 
Қапталыңда мен болсам. 
Қосықлар келсе дөреўге,

---

Ибрайым Юсупов - Йош
kitapxana.com
- Қарақалпақ әдебиятының электрон китапханасы 132
Қалсаң көлде түнеўге, 
«Сүйемен» десең биреўге, 
Сол биреўиң мен болсам. 
Болот болсам жылқы айдар, 
Тартып алсам Жантайдан. 
Сулыўлықта халық айтар 
Ақ мөр менен тең болсаң. 
Төртеў қалсақ аўлақта: 
Самал ессе таў жақтан, 
Соң көл менен сол ўақта 
Сен болсаң да мен болсам. 
Соң көлдиң жаўған қарында, 
Жаслығымның барында, 
Қалар едим Нарында, 
Егер жаным сен қалсаң... 
1973-жыл. 
Ақмөр – халық аўзында ертек болған сулыў қыз, жылқыман Болот – оның ашығы
(И.Ю.)
АЛАРША
– О, таў суўы, неге бәрҳама 
Шала өкпе болып шабасаң? 
Көксиңди сен қыя тасларға 
Урып, 
Урып, 
Урып ағасаң? 
– Мен тәкаббыр сулыў қыз едим, 
Жигитлерди мисе тутпаған.

---

Ибрайым Юсупов - Йош
kitapxana.com
- Қарақалпақ әдебиятының электрон китапханасы 133
Бир жигитке мен былай дедим: 
«Кет жоғал сен, көринбе маған!» 
Жигит мыйық тартты бир күлип, 
Басқалардай ашыўланбады. 
Қыз кеўлиниң соншелли бийик, 
Сонша нәзиклигин аңлады. 
Ҳәм еситтим алыс таўларда 
Қорғап мениң қыз намысымды, 
Жалғыз қарсы шығып жаўларға, 
Мени ойлап жүрген деп муңлы. 
Көрдим сол жигитти түсимде: 
Жараланып қулапты аттан, 
Ондай болып мени ҳеш ким де 
Сүйе алмасын мен аңламаппан. 
Бир басына аўыр күн туўып, 
Жатса керек далада қашшан. 
Сол жигиттиң жарасын жуўып, 
Сол жигиттиң бир шөлин бассам. 
Сол ушын да секирип жарға, 
Өрден ыққа қарай шабаман, 
Ақ көксимди қара тасларға 
Урып, 
Урып, 
Урып ағаман. 
Сентябрь, Фрунзе. 1975-жыл. 
Аларша – қырғыз елиндеги бир таў дәрьясы. (И. Ю.)