Kirish,,0'rta asrlar tarixi haqida

Birlashish sabablari. X - XI asrlarda mamlakatda ishlab chiqaruvchi kuchlar yanada o`sdi. Bu o`z navbatida savdo-sotiqning rivojlanishiga sabab bo`ldi. Savdo-sotiqning rivojlanishi mamlakat viloyatlari o`rtasida mehnat taqsimotining vujudga kelishiga olib keldi.

Yodda tuting Viloyatlar o`rtasidagi mehnat taqsimoti har bir viloyatning ishlab chiqarishning u yoki bu sohasiga ixtisoslashuvidir.

Bir viloyatda temir rudasi, ikkinchisida oziq-ovqat mahsulotlari, uchinchisida esa movut ishlab chiqarish yetakchi sohaga aylangan. Bu hodisa viloyatlarning o`zicha yashashi holatiga barham bergan.

Ularni bir-biri bilan chambarchas bog`lagan. Hatto feodallar ham, krepostnoylar ham bu jarayonga tortilgan.

Feodallar hunarmandchilik buyumlari hamda shahardan keltiriladigan boshqa tovarlarni sotib olish uchun tobora ko`proq pulga muhtoj bo`la boshlaganlar. Shu tufayli barshchina va obrokni ham pul to`loviga o`tkaza borganlar.

Obrokni pul bilan to`lash krepostnoylarni bozor bilan bog`lab qo`ygan. Ular endi o`z chek yerlarida yanada ko`proq mahsulot yetishtirishga harakat qilganlar. Ortiqcha pulga ega bo`la boshlagan krepostnoy bora-bora pul evaziga o`z erkini sotib ola boshlagan. Shu tariqa krepostnoy qaramlikdan ozod bo`lib, erkin ishlab chiqa-ruvchiga aylangan. Bu esa mamlakatni birlashtirish uchun sharoit yaratgan.

Mamlakatning bundan keyingi taraqqiyoti ishlab chiqaruvchi kuchlarning yanada o`sishi va savdo-sotiqning rivojlanishiga bog`liq bo`lib qolgan. Biroq mamlakatda davom etayotgan feodallar o`rtasidagi o`zaro urushlar taraqqiyot yo`lidagi asosiy g`ovga aylangan edi.