Kirish,,0'rta asrlar tarixi haqida

Savdo-sotiq rivoji yo`lidagi to`siqlar. O`rta asrlarda savdo-sotiq foydali, ammo qiyin va xatarli ish edi. Savdogarlarni quruqlikda yo`lto`sarlar - ritsarlar talardi. Dengizda esa qaroqchilar shilib olardi. Savdogarlar feodal yeridan, ko`prigidan, daryo kechuvidan o`tganligi uchun boj to`lashga majbur edi. Feodallar o`z daromadini ko`paytirish uchun quruq joylarga ham ko`prik solganlar. Savdogarlar ot-aravalaridan ko`tarilgan chang uchun ham soliq to`laganlar.

Yo`llar tor bo`lib, tosh yotqizilmaganligi uchun bahor va qishda yurib bo`lmaydigan darajada botqoq bo`lib ketardi. Arava g`ildiraklari sinishi oqibatida yerga ag`darilib tushgan tovar o`sha yer egasining o`ljasi hisoblanardi. Dovulda halokatga uchragan kema yukini to`lqin qirg`oqqa chiqarib tashlasa, sohil egasi bo`lgan feodal o`sha tovarlarni o`ziniki qilib olardi.

Savdogarlar o`zlarini talonchilikdan himoya qilish uchun gildiyalarga birlashganlar.

Ular talanishdan omon qolish maqsadida bir to`da bo`lib olishar, soqchilar yollar va ularning qo`riqchiligida safarlarga chiqardilar.