Кириш Комплекс географик амалиёт талабаларнинг табиий ва иқтисодий географик фанлардан олинган назарий билимларни амалда мустаҳкамлаш учун мўлжалланган. Амалиётнинг мақсади ва вазифалари

Кириш
Комплекс географик амалиёт талабаларнинг табиий ва иқтисодий географик фанлардан олинган назарий билимларни амалда мустаҳкамлаш учун мўлжалланган.
Амалиётнинг мақсади ва вазифалари
Амалиётни ўтказишдан асосий мақсад ўқув жараёнида табиий ва иқтисодий география фанларидан олинган назарий билим ва малакаларини амалда ҳаёт билан боғлаш, экскурсия жараёнида мустаҳкамлашдан иборат.
Амалиёт давомида талабаларнинг асосий эътибори дала шароитида табиий ва иқтисодий географик тадқиқотлар кўникмалари ҳосил қилишга қаратилади. Талабалар Ўзбекистоннинг диққатга сазовор бўлган марказий, ғарбий ҳамда жанубий районларининг табиий ва иқтисодий географик хусусиятларини, хусусан, Сирдарё, Жиззах, Самарқанд, Бухоро, Қашқадарё ва Хоразм вилоятлари табиати, ландшафтларининг ўзига хослиги, айрим шаҳарлари, улардаги рекреация ресурслари ва туризм объектлари, саноат корхоналари ва аҳолига хизмат кўрсатувчи тармоқларининг жойлашуви ҳамда ривожланишидаги ўзига хос жиҳатлари билан танишиш ва ҳар томонлама ўрганишга қаратилади. Қўйилган мақсадга эришиш учун қуйидаги қатор вазифалар белгиланган.
Амалиётнинг вазифалари
1. Республикамизнинг баъзи табиий географик округларига табиий географик тавсифи, ландшафтларидаги ўхшашлик ва тавофутларини, тарихий шаҳарлари, уларнинг иқтисодиёти, ижтимоий ҳаёти, туризм фаолиятида тутган ўрни билан таништириш, ишлаб чиқариши, аҳолиси ва уларнинг ўзига хос жиҳатлар ҳамда тафовутларини ўрганиш.
2. Талабаларда ушбу объектлар фаолиятини мустақил кузатув олиб боришга ўргатиш. Ҳудудларнинг табиат компонентлари, табиий комплекслари, уларнинг ҳолати, бир-бирига боғлиқлиги, табиий бойликларини ўрганиш, улардан оқилона фойдаланиш, республикамиз табиатидаги тавофутларни тушуниб олиш, геоэкологик муаммоларини келиб чиқиш сабаблари ҳамда уларни бартараф этиш учун кўрилаётган чора-тадбирлар билан таништириш. Шунингдек, алоҳида муҳофаза этиладиган ҳудудлар ва уларнинг биохилма-хилликни сақлашдаги аҳамиятини ўрганиш. Таркиб топаётган саноат корхоналари маҳсулот ишлаб чиқариши, турлари, сифати, ҳолати, меҳнат ресурсларининг аҳволини, ривожланиш муаммоларини ўрганишга қаратилади.
3. Талабаларни кундалик дафтарини қандай тутишга ўргатиш, кузатиш натижаларини ёзиб бориш, мустақил фактик материал тўплашга ўргатиш.
4. Талабаларни саноат корхоналари маиший хизмат объектлари, бозорлар шаҳар жойларни мустақил тадқиқ этишга ўргатиш.