Кимёвий технология Ўзбекистон республикаси олий ва ўрта махсус талим вазирлиги н. Каттаев, М. Мухаммадиев, Х. Мирзохидов

15.2 Каучикни қайта ишлаш.
Тоза каучик буюм тайёрлашга ярамайди. Чунки у узилишга чидамсиз, элестиклиги кам, юқори ҳароратда ёпишиб қолади, паст ҳароратда эса мурт, синувчан бўлади. Шунинг учун каучикни турли органик ва ноорганик маҳсулотлар билан аралаштирилиб сўнгра ундан полифабрикатлар ва тайёр маҳсулотлар шаклига келтирилади. Шундан кейин вулканланади ва резина буюмлар олинади. Резина ўзининг ажойиб хоссаларига эга бўлганлигидан халқ хўжалигининг турли соҳаларда кенг ишлатилади.
Каучикни турли органик ва ноорганик моддалар билан аралаштириш ёйувчи аппаратларда валцларда ёки ёпиқ резина аралаштиргичларда олиб борилади. Вальцлар (-расм) бу бир-бирисига қараб айланувчи ичи бўш иккита ғилдираклардан иборат бўлиб, ички бўшлиғида совуқ сув айланиб уни совутиб туради, ғилдиракларнинг узунлиги 1,5 – 2 м ташки юзаси 0,5 -0,65 м бўлиб пўлатдан ёки оқ чўяндан ясалган, ғилдираклар орасидаги тирқишни олдинги ғилдиракни уёқ-буёққа суриш билан 3 дан 10 миллиметргача ўзгартириш мумкин. Шу тирқишга аввал каучик солинади, ишқаланиш туфайли у қизиб юмшайди. Сўнгра унга паста-юмшатгич, тезлатгич, активловчилар аралашмаси қўшилади, ундан сўнг қурум ва бошқа тўлдирувчилар қўшилади ва охирда олтингугурт солинади. Аралаштирилгач ҳосил бўлган резина аралашмаси (массаси 150 кг гача аралаштириш вақти 40 минутгача) варақлар шаклида кесилади. Ёпиқ резина аралаштиргич аппарати ( расм) катта унумдорликка эга. Унинг камерасида (бўлмасида) 1 бир-бирисига қараб турли тезликларда бўртмаси бўлган иккита пўлатдан ясалган ротор (машиналарнинг қобиқлари ичида жойлашган айланувчи қисми) 2 айланади, роторлар оралиғидаги тирқишга аралашма суртилади.(аралашма массаси 200 кг гача). Камера юқорисидаги затвор (очиб ёпувчи механизм, қулф) 3 билан маҳкам ёпилади ва сув билан совутилади. Аралаштириш 5-10 минут давом этади. Бунда ҳарорат 100-120⁰ С гача кўтарилади, вақтидан илгари вулканланмаслиги учун олтингугурт аралаштириш тугашига 0,5 минут қолганда киритилади. Остки затвор 6 четга сурилиб аралашма тукиб олинади.