Kasb-hunar kolleji "tasdiqlayman"

Tushuntirish xati

Mazkur dastur o‘z oldiga o‘rta maxsus ta’lim tizimida «Estetika» kursini zamonaviy talablar asosida o‘qitilishini ta’minlashga qaratilgan. U akademik litseylar va kasb-hunar kollejlari uchun mo‘jallangan bo‘lib, o‘quvchilarga estetika tarixi va nazariyasidan, san’at turlari, texnika estetikasi, tabiat estetikasi va turmush estetikasidan etarli bilim berishga hamda ular estetik didini yuksaltirishga yo‘naltirilgan. Unda avvalgisidan farqli o‘laroq, seminarlar va amaliy mashg‘ulotlarga keng o‘rin berilgan: Bu, shubhasiz, o‘quvchilarning o‘z ustida ishlashlarini, amaliy estetika bilan faol shug‘ullanishlarini ta’minlaydi. Dasturda taklif etilgan nazorat turlari o‘quvchilar jildonidan fan mazmunining bo‘limlar bo‘yicha nisbatan mukammal o‘zlashtirilishini taqozo qiladi, ular o‘quv turlarini iloji boricha to‘liq qamrab olish imkonini beradi. Ayni paytda mazkur nazorat turlari o‘quvchining ham og‘zaki, ham yozma nutq madaniyati va mahoratini yuksaltirishni ko‘zda tutadi. Shuningdek, dastur mazmunan «Estetika» kursining uzviyligini hamda boshqa falsafiy va ijtimoiy-gumanitar fanlar bilan muvofiqlashuvini ta’minlashga qaratilgan. Unda o‘quvchilardagi eng yangi adabiyotlardan, asl manbalar va muhim xorijiy nashrlardan foydalanish ko‘nikmasining takomillashuviga alohida e’tibor berilgan.

Yana shuni ta’kidlash joizki, mazkur dastur qat’iy qonun maqomidagi hujjat emas, u namunaviylik tabiatiga ega. Shu bois har bir ma’ruzachi muayyan akademik litsey va kasb-hunar kolleji yo‘nalishidan kelib chiqib, dasturdagi mavzularning ba’zilariga mufassalroq, boshqalariga umumiyroq tarzda yondashishlari va bunday yondashuvlarni o‘z ishchi dasturlarida aks etirishlari mumkin.O‘ylaymizki, mazkur dastur ham mutaxassis-o‘qituvchilarga, ham o‘quvchilarga qo‘l keladi.