Kafedra mudiri: I. Qur’onov

Dorilarni yozib berish

Dorilarni yozib berish, ularni bo‘limda saqlash va qo‘llash nihoyatda muhim va mas’uliyatli vazifadir. Retseptlar, ayniqsa kuchli ta’sir qiladigan va zaharli moddalarni palapartish yozish, beparvolik qilish, xatoliklarga yo‘l qo‘yish bemorga tuzatib bo‘lmaydigan zarar yetkazishi mumkin. Shuning uchun tibbiyot hamshirasidan dori-darmonlar bilan ishlash qoidalarini puxta bilishi talab qilinadi. Dorilarni har kuni yozib berish lozim. Bu ish bilan hamshira shug‘ullanadi, u shifokor bilan birga bemorlarni ko‘rib chiqishda qatnashadi va uning ko‘rsatmalarini diqqat bilan yozib oladi. Bemorlar ko‘rib chiqilgandan so‘ng hamshira kasallik tarixidan barcha tayinlangan dorilarni maxsus ko‘rsatmalar varaqasiga va retseptura daftariga ko‘chiradi, bu daftarlar ikki nusxa bo‘lib: biri dorixonaga dorilar tayyorlash uchun yuboriladi, ikkinchisi esa bo‘limda nazorat uchun qoldiriladi. Kuchli ta’sir qiladigan va zaharli moddalar alohida daftarga yoziladi, ularga bemorning ismi sharifi, kasallik tarixi raqami, soni, kuni, ampulalar miqdori qayd qilinadi va hamshira o‘z imzosini qo‘yadi. Butun bo‘limning retsepturasi bo‘limning katta hamshirasiga kelib tushadi, u o‘z navbatida retseptlarning to‘g‘ri yozilganligini tekshiradi, shundan so‘ng umumiy retsept (talabnoma) yozadi va tekshirish hamda ularga imzo qo‘yish uchun bo‘lim mudiriga olib boradi. Tayyor bo‘lgan talabnoma dorixonaga yuboriladi va shu asosida dorilar tayyorlanadi. Katta kasalxonalarda dori-darmonlarni bo‘limga yetkazish uchun maxs²u³s⁸ transport ajratiladi.

Тibbiyot hamshirasi dorixonadan dorilarni qabul qilib olishda dori ustidagi yozuvlarni retseptura daftarlaridagi yozuvlar bilan solishtirib, dozasini, dorilarning tashqi ko‘rinishini tekshiradi, shundan so‘ng hamma dorilarni maxsus shkafga solib qulflab qo‘yadi. Dozalarda biror nomuvofiqlik yoki dori tayyorlashda biror kamchilikka yo‘l qo‘yilgan bo‘lsa hamshira shu ondayoq bo‘lim mudiriga xabar qilib dorilarni yana dorixonaga qaytaradi. Dori moddalari dorixonadan ishlatish uchun tayyor holda keladi. Тibbiyot hamshirasi majmuani o‘zgartirishi, suyuqlikni bir shishadan ikkinchisiga quyishi, kukun yoki xabdorilarni bir paketga solib qo‘yishi va kukunlardan eritma qilishi aslo mumkin emas. Dorilarni etiketkasiz saqlashga ruxsat berilmaydi. Hamshira dori-darmonlar berishdan oldin, uning qutisidagi yozuvini diqqat bilan o‘qib chiqishi lozim.