Jobası: Kirisiw Jumıstıń maqseti hám wazıypaları Temanıń izertleniw jaǵdayı Tiykarǵı bólim I bap. T. Jumamuratov shıǵarmalarında qaratpa aǵzalardıń qollanılıwı

Atlıq sózlerden bolǵan qaratpalar

T.Jumamuratov shıǵarmalarında atlıqlardıń qaratpa wazıypasında keliwi jiyi ushırasadı. Álbette, barlıq atlıq sózler qaratpa wazıypasın atqara bermeydi. Qaratpa wazıypasında geypara atlıqlar kobirek, geyparaları kem qollanılıp, menshikli hám ǵalabalıq qubılıslardıń atın bildiriwshi atlıqlardan, awıspalı atlıqlardan bolıp qaratpa aǵzanı bildirip kelgen.

Menshikli atlıqlardan bolǵan qaratpa aǵzalar

Shayır shıǵarmalarında qaratpa wazıypasında menshikli atlıqlar adam atları, geografiyalıq orınlardıń, dárya, teńiz, kóllerdiń, úy haywanlarınıń atları arqalı bildirilgen. Ásirese, adam atları jiyi qollanılǵan. Mısalı:

Tilewbergen, sulıw ediń jasıńda,

Nege sonsha joǵaltıpsań kórkińdi? (“Báhárde gúl”, 52-bet)

T.Jumamuratov óz shıǵarmalarında oqıwshınıń dıqqatın awdarıw, qaratıw ushın adam atların jiyi qollanǵan. Ásirese, bunı dialog gáplerde qollanǵaniń kóremiz. Shıǵarmalarda geografiyalıq atamalardı bildiriwshi menshikli atlıqlar da qaratpa xızmetinde jiyi ushırasadı. Mısalı:

Oyım sol: búgin keldim ǵoy, Qırım,

Kórmegen edim jerińdi burın (“Ushırasıw”, 5-bet)