Жисмоний маданият соҳасида илғор хорижий тажрибалар

Yirik motorikani rivojlantirish. Bolaning jismoniy faolligini oshirish, bo‘yining me'yorida o‘sishini kuzatib borish, salomatligini mustahkamlash; bolaning salomatligini inobatga olgan holda chiniqtirish chora-tadbirlarini amalga oshirish lozim.
Bolaning harakatlanish faoliyatini turli gimnastik mashqlar va o‘yinlar bilan boyitib borish; jismoniy tarbiya instruktori ko‘rsatmasi asosida harakatlarni to‘g‘ri bajarishga undash, faol harakatlanishning jamoaviy shakllariga jalb qilish, bolada tanish harakatlarni oson va erkin, bir maromda, fazoviy yo‘nalishdan adashmay, muvozanatni saqlagan holda bajara olish ko‘nikmalarini shakllantirish.
Uch va to‘rt yoshgacha bo‘lgan bolalar bilan o‘tkaziladigan boshlang‘ich gimnastika mashqlari texnikasi (3-4 yosh). Bola 3 yoshga qadam qo‘yganda jismoniy o‘sishi bir qadar sekinlashadi. Bu davrda uning vazni 16-18 kg atrofida, bo‘yi 90-100 sm gacha yetadi. Bola jismonan ancha chiniqib, asab tizimi taraqqiy etadi. Tayanch harakat organlari takomillashib boradi. Bolada mustaqillik ortadi, hissiyot hamda sensor idroki rivojlanib boradi. Uch yoshli bolaning diqqati qisman markazlashadi, xotirasi mustahkamlanib, borliqni idrok etish jarayoni boshlanadi, faraz qilish imkoniyatlari vujudga keladi.
Bolani gavdasini tik tutishga o‘rgatish, jismoniy sifatlarini yanada rivojlantirish hamda sport turlariga qiziqishini orttirish, jismoniy harakat turlari bilan tanishtirish, faol bo‘lishga undash, turli mashqlarga qiziqish uyg‘otish muhimdir. Gimnastika mashg‘uloti vaqtida bolani qo‘l va oyoq harakatlarini mashqqa muvofiqlashtirishga, oyoqni sudramay, boshni egmay yengil yurishga odatlantirish va muvozanat saqlashga o‘rgatib borish.
Yirik motorikani rivojlantirish. 3-4 yoshli bola yurish, yugurish, sakrash, yumalatish, irg‘itish, ilib olish, emaklash, tirmashish, muvozanat saqlash kabi asosiy harakat mashqlarini bajara oladi. Bu yoshdagi bolada turli yo‘nalishlarda yurish va yugurish, turli balandliklardan sakrash, koptoklarni bir-biriga qaratib yumalatish, ikki qo‘llab pastdan, ko‘krak oldidan, boshidan oldinga oshirib irg‘itishni rivojlantirish.