Jamiyat va madaniyat Kirish. I. Bob jamiyat va madaniyat tushunchasi 1 Madaniyat va jamiyat

Shu bilan birga qadriyatshunoslik masalalarini o’rganish mamlakatimizda umuminsoniy madaniyatning yutuqlari, jahon va sharq xalklariga xos urf-odat va ananalar, o’tmishimizning boy merosi, yuksak axloqiy talablar, yurtimizdagi qatlamlar, partiyalar fikrlar va qarashlar rang-barangligi hamda ularning istiqlolni mustahkamlash va qadriyatlarning yangi tizimi mustahkamlanishi bilan bog’liq mavzularni chuqur o’zlashtirish uchun keng imkoniyatlar yaratadi.

Qadriyatshunoslik mavzusiga bag’ishlangan ilmiy-nazariy manbalarni va O’zbekistonda yangi qadriyatlar tizimi shakllanishi amaliyotini Prezidentimiz asarlari asosida o’rganish bu yo’nalishdagi ustuvor xususiyatlarini anglash imkonini ham beradi. Bunda hozirgi davrda qadriyatlarni barqaror qilish amaliyotining o’ziga xos xususiyatlarini bugungi dunyo voqeliklari va mamlakatimiz hayotiga doir misollar asosida tahlil qilish muhim ahamiyatga ega.

Bundan tashqari, "Qadriyatlar" tushunchasini qadriyatshunoslikning maxsus kategoriyasi sifatida o’rganish ijtimoiy-falsafiy bilimlar tizimi va ilmiy-aksiologik muammolarni hal qilish borasidagi tadqiqotlar mazmuni kengayishiga olib keladi. Bu esa ushbu fanni o’rganayotgan yoshlar tafakkuri va dunyoqarashining zamonaviy bilimlar bilan boyishiga yordam berishi shubhasiz.

Globallashuv jarayonlari kuchayib borayotgan hozirgi davrda jamiyatning ijtimoiy tuzilishi, insoniyat hayoti va faoliyatining ko’p qirraligi bilan qadriyat shakllarining uzviy aloqadorligini o’rganish ularni barqaror qilish amaliyotining xususiy jihatlarini va qadriyatlar bilan bog’liq kundalik o’zgarishlarnigina emas, balki bu jarayonlarning umumiy qonuniyatlarini ham bilib olish imkonini beradi.

Shu ma’noda, xalqimizning mustaqil taraqqiyot yo’li uchun tanlab olingan rivojlanish modelini amalga oshirish jarayonida aynan qadriyatlar omiliga nihoyatda katta ahamiyat berilayotgani bejiz emas.

Bu esa o’z navbatida, yurtimizda mustaqillikka asoslangan, umuminsoniy qadriyatlar ustivorligi ta’minlangan, pirovard natijada xalqimizning azaliy orzu-umidi bo’lgan huquqiy demokratik davlat va fuqarolik jamiyatini qurish, xalqimizning kelajagi uchun suyanch va tayanch bo’ladigan komil insonlarni voyaga etkazish imkonini yaratadi. “Mamlakatimizda demokratik islohotlarni yanada ⁴chuqurlashtirish va fuqarolik jamiyatini rivojlantirish kontseptsiyasi” bu yo’nalishda ham yangi bosqichni boshlab berdi.