Жабборов, Рустам 100 жумбоқли ҳикоя / Рустам Жабборов. Тошкент: Янги

ҚАЛОВИНИ ТОПОЛМАГАН МЕҲМОН
Олег бу шаҳарга келганидан бери орадан икки ҳафта-
ча вақт ўтган бўлса-да, ҳали-ҳануз кўниколмасди. Ҳаво-
нинг иссиқлиги, кўчалардаги тартибсизлик, тирбандлик, 
муссон ёмғирлари... Майли, буларга-ку амаллаб чидаса 
бўлар. Аммо, манави чивинлар...
Олег Даккада яна бир ҳафта қолишини ўйлаб, юра-
ги зирқиради. То уйга қайтгунча чивинларга буткул ем 
бўлади-ку? Тўғри, чивинлар ҳамма жойда бор. Москва-
даги квартирасида ҳам баъзан ғинғиллаб, чақиб жон-
га тегарди. Шунда шартта дўконга тушиб, фумигаторми, 
спрейми, хуллас, бирорта восита сотиб олар, хонани 
шамоллатиб, ҳалиги воситаларнинг ёрдами билан тинч-
гина уйқуга кетарди. 
Бу ерда эса иқлим ҳам, вазият ҳам, ҳатто чивинлар 
ҳам бошқача. Тропик чивинлар билан қандай курашиш 
кераклигини билмаса... Ниҳоят, шу шаҳарда анчадан 
бери яшаб келаётган, аллақайси рус компанисининг ва-
колатхонасида ишлайдиган таниши Сергейга сим қоқди. 
Қисқача салом-аликдан кейин вазиятни тушунтирди. 
– Ҳа, бу ерда яшашнинг ўзи бўлмайди, – деди Сергей-
га салмоқлаб ва ҳар бир дорихонада чивинларга қарши 
турли хил препаратлар борлигини айтди. 
Чивинлардан тоқати тоқ бўлган Олег шу заҳоти меҳ-
монхонадан чиқиб, энг яқин дорихонага кирди ва тани-
ши айтгандек чивинларга қарши воситани сўради. Со-
тувчи бола хушмуомалалик билан бош ирғаб, хорижлик 
харидорга суртма кўринишидаги препаратни узатди. 
Олег ўз хонасига қайтгач, дарҳол воситанинг йўриқ-
номасини кўздан кечирди. Жин урсин, ҳаммаси бенгал 
тилида ёзилган экан. Олег эса бу тилда салом-аликдан 
бошқа нарсани тушунмайди. Айниқса, гажакдор бенгал 
ҳарфларининг бирортасига ҳам тиши ўтмайди. Балки 
меҳмонхона хизматчисини чақириб, таржима қилиб 

---

163
«
100 жумбоқли ҳикоя
»
беришини сўрар? Афсуски, меҳмонхона хизматчиси ҳам 
русчасини тушунмайди. Олег эса инглиз тилини яхши 
билмайди. 
Сергейга қўнғироқ қилишдан ҳам воз кечди. Ҳадеб 
қўнғироқ қилаверадими? Йўриқномада нима деб ёзи-
шарди? Фалон-пистон касалликларга қўллаш мумкин 
эмас, фалон шаҳарда ишлаб чиқарилган ва ҳоказо. Олег 
учун ушбу препаратнинг ўзига хос хусусиятларидан 
кўра, фойдаси муҳимроқ. Нима бўлса ҳам шу савил чи-
винлардан қутулса бўлгани. 
Шартта ечиниб, мазни баданига яхшилаб ишқала-
ди-да, чироқни ўчириб кўрпага кирди. Аммо кечаси 
билан ухламади. Назарида, чивинлар ҳар кунгидан-да 
кўпроқ чақиб ташлаганди. Эрталаб туриб, чивинлар ба-
данини илма-тешик қилиб ташлаганини кўрди. Бу қанақа 
дори ўзи? Ё Сергей атайин унинг устидан кулдимикин? 
Балки дорихоначи адашиб бошқа дорини бергандир? Ё 
дорининг номини хато айтдимикин? Нима бўлганда ҳам 
дори унга акс таъсир кўрсатгани аниқ. 
Асабийлашиб, хонадаги телефондан Сергейга сим 
қоқди. 
– Мен дорининг йўриқномасини кўрмасдан бир нима 
деёлмайман, – деди Сергей. – Ярим соатларда олдингга 
бораман.
Сергей ҳамюртининг ёнига етиб келганида, унинг 
аъзои баданини чивинлар талаб ташлаганини кўриб, 
ҳам ачинди, ҳам кулгиси қистади. Кейин ҳалиги дори-
нинг йўриқномаси билан танишиб чиқаркан, у қаҳ-қаҳ 
кулгидан ўзини тутиб туролмади. 
Сизнингча, йўриқномада нима деб ёзилган бўлиши 
мумкин?

---

Рустам Жабборов
164
Саксон бешинчи ҳикоя