Ishlabchiqarishda boshqaruv fakulteti «buxgalteriya hisobi va audit» kafedrasi

7-chizma. Buxgalteriya hisobi uslubining elementlari
Quyida buxgalteriya hisobi uslubining alohida elementlariga qisqacha tavsif beramiz.

Kuzatish va hujjatlashtirish. Kuzatish va hujjatlashtirish korxonada amalga oshirilgan xo‘jalik operatsiyasi to‘g‘risida yozma guvohlik bo‘lib, buxgalteriya hisobi ma’lumotlariga huquqiy maqom beradi. Birlamchi hujjatlar, shu jumladan, axborotning mashina o‘qiydigan qog‘ozsiz shakldagi axborot tashuvchi vositalar ham, korxona xo‘jalik faoliyatini buxgalteriya hisobida yalpi va uzluksiz aks ettirishni ta’minlab beradi.

Buxgalteriyaga, foydalanish uchun me’yoriy hujjatlarda nazarda tutilgan barcha rekvizitlari to‘ldirilgan va to‘g‘ri rasmiylashtirilgan hujjatlargina qabul qilinadi. Bunday rekvizitlarga quyidagilar kiradi: korxonaning nomi, hujjatning nomi, raqami, tuzilgan sanasi, xo‘jalik operatsiyasining qisqacha mazmuni, uning miqdoriy va pul ifodasi hamda mas’ul shaxslarning imzolari. To‘g‘ri rasmiylashtirilgan hujjatlar korxonaning moliya-xo‘jalik faoliyatlari ustidan dastlabki va joriy nazorat o‘rnatish hamda ularning ish natijalariga ta’sir ko‘rsatish imkoniyatini ta’minlaydi.