Ishlabchiqarishda boshqaruv fakulteti «buxgalteriya hisobi va audit» kafedrasi

To‘lovga olingan mablag‘lar - haridorlarning, ularga jo‘natilgan tovarlarni tan olishlari bo‘yicha qarzlari kiradi.

Xo‘jalik mablag‘larini xo‘jalik jarayonidagi funksional roliga ko‘ra ishlab chiqarish fazasidagi mablag‘lar, muomala fazasidagi mablag‘lar, korxona faoliyatidan vaqtincha chetlatilgan mablag‘lar kabi guruhga bo‘lib o‘rganish, ularning mazmun va mohiyatini yanada chuqurroq tushunishga imkon yaratadi.

Ishlab chiqarish fazasida ishtirok etadigan mablag‘larga mahsulot ishlab chiqarish faoliyati bilan shug‘ullanadigan yoki xizmat ko‘rsatish va ishlarni bajarish bilan band bo‘lgan korxonalarning mehnat vositalari (mehnat qurollari va mehnat buyumlari) kiradi.

Ishlab chiqarish jarayonida mehnat qurollari orqali mehnat buyumlariga ta’sir etib yangitdan mahsulot yaratiladi. Mehnat qurollari ishlab chiqarish jarayonida uzoq muddatlar xizmat qilib, o‘zining natural ko‘rinishini saqlab qoladi. Ularning tarkibiga ishlab chiqarishning texnologik jihozlari, stanoklar, mashinalar, transport vositalari, qishloq xo‘jaligi mashinalari, ishlab chiqarish sexlarining binolari, korxona qurilmalari, inshoatlari va boshqa shularga tenglashtiriladigan mehnat qurollari kiradi. Mehnat buyumlariga esa, ishlab chiqarish jarayonida faqat bir sikl ishtirok etib, o‘zining natural shaklini o‘zgartiradigan va yangitdan ishlab chiqarilgan mahsulotlarning moddiy asosini tashkil qiladigan buyumlar kiradi. Ularning tarkibiga xom-ashyo, asosiy materiallar, yordamchi materiallar, ehtiyot qismlar, yoqilg‘i, kam qiymatli va tez ishdan chiqadigan buyumlar, idish va idish materiallari, yarim tayyor mahsulotlar, tugallanmagan ishlab chiqarish qoldiqlari va shu kabi boshqa mehnat buyumlarini kiritish mumkin. Mehnat buyumlari ishlab chiqarish jarayonida bir sikl ishtirok etib o‘z qiymatini yangitdan yaratilgan mahsulotlar tannarxiga to‘liq o‘tkazadi.