«ишлаб чиқариш инфратузилмаси» фанидан маърузалар матни

Тижорат банки - тижорат ташкилоти бўлиб, банк фаолияти деб ҳисобланадиган қуйидаги фаолият турлари мажмуини амалга оширадиган юридик шахсдир: юридик ва жисмоний шахслардан омонатлар қабул қилиш ҳамда қабул қилинган маблағлардан таваккал қилиб кредит бериш ёки инвестициялаш учун фойдаланиш, тўловларни амалга ошириш. Ўзбекистонда банклар акциядорлик жамияти тарзида ташкил этилади. Банкларнинг асосий турлари:
- Универсал банк – банк операцияларнинг барча асосий турларини амалга оширадиган банк;
- Инвестиция банки – инвестицияларга, хусусан қимматли қоғозларга ихтисослашган банк
- Жамғарма банки – аҳолини пул маблағларини жалб қилишга ихтисослашган банк
- Ипотека банки – ипотека кредитини беришга ихтисослашган банк
Нобанк кредит ташкилоти – бу қонун билан белгиланган алоҳида банк операцияларини амалга ошириш ҳуқуқини қонуний тартибда олган тижорат ташкилоти.
2014 йил 1 апрель ҳолатида Ўзбекистонда жами 29 та тижорат банклари фаолият кўрсатади. Улар капиталининг умумий қиймати 6,3 трлн. сўмни ташкил этади. Бугунги кунда банк тизими капиталининг етарлилик даражаси 24 фоизни ташкил этади ва у халқаро банк назорати бўйича Базель қўмитаси томонидан қабул қилинган талаб (8 фоиз) га нисбатан 3 баробар юқори бўлиб, 2014 йилнинг 1 апрель ҳолатига кўра банк активлари 36,4 трлн. сўмдан ошиб кетди. Республиканинг етакчи банклари: Ташқи иқтисодий фаолият миллий банки, «Асакабанк», «Ўзсаноатқурилишбанк», «Агробанк», «Ипотекабанк» ҳамда «Ипак йўли», Халқ банки, “Қишлоққурилиш банк”, “Микрокредитбанк”. Банклар томонидан, шунингдек устувор вазифа қилиб белгиланган мамлакатимиз иқтисодиётининг рақобатбардошлигини ошириш, иқтисодиётни ва унинг етакчи тармоқларини модернизация қилиш, техник ва технологик жиҳатдан янгилашни жадаллаштиришга қаратилган кенг кўламли чора-тадбирлар амалга оширилмоқда.
Иқтисодий ночор корхоналарни молиявий соғломлаштириш ва бошқариш механизмларини такомиллаштириш борасида ноанъанавий ёндашувнинг амалга оширилиши натижасида тижорат банклари балансига қабул қилинган 120 та иқтисодий ночор корхона ишга туширилиб, янги стратегик инвесторларга сотилди. Натижада 25 мингдан зиёд қўшимча иш ўринлари яратилди. Мазкур корхоналар томонидан ишлаб чиқарилган 560 млн. АҚШ доллари миқдоридаги маҳсулотлар экспорт қилинди.