Inson va tuproq” kitobi “Jayron” ekologik markazi

Chuqurlik-

Chust shahri- Namangan viloyati Chust tumanidagi shahar, tuman markazi. Fargʻona vodiysining shimoliy chekkasida, togʻ etagidagi tekislikda, Chust soyi sohilida, Namangan shahridan 36 km gʻarbda, Chust temiryoʻl stansiyasidan 13 km shimolda, dengiz sathidan 1000–1200 m balandlikda joylashgan. Aholisi 64 mingga yaqin. Chust Fargʻona vodiysining qadimiy shaharlaridan biridir. Chustning shimoliy chekkasidagi Buonamozor (Bibionamozor) manzilgohi hududidan Chust madaniyatiga oid materiallar topilgan. Chust qadimdan Fargʻona vodiysining hunarmandchilik markazlaridan biridir. Chustlik temirchilar, toʻquvchilar, sopol buyum ustalari, zargarlarning mahorati shuhrat qozondi, chust pichoqlari va doʻppilarining dongʻi keng tarqaldi. 1912-yilda 6 paxta tozalash, charm zavodlari faoliyat koʻrsatgan. 1926-yildan Chust yangi tashkil qilingan Chust tumanining markazi boʻldi. Chustda „Barion“, „Paxta tolasi“, „Chustmash“ va boshqa aksiyadorlik jamiyatlari, „Suvmash“, non zavodlari va savdo korxonalari, bosmaxona, koʻzi ojizlar korxonasi, kichik korxona, mikrofirmalar, qurilish, transport korxonalari va boshqalar faoliyat koʻrsatadi. Umumiy taʼlim maktablari, shu jumladan, gimnaziya-internat maktabi, sanatoriyinternat maktabi, iqtidorli bolalar internat maktabi, 2 bolalar va musiqa sanʼat maktablari, 6 kasb hunar kolleji, 3 bolalar va yoshlar sport maktabi, stadion, tennis korti, suzish havzasi, kutubxonalar va klublar, muzey, madaniyat va istirohat bogʻi, tugʻruqxona, markaziy tuman kasalxonasi va uning boʻlimlari ishlab turibdi. Chust orqali Fargʻona halqa avtomobil yoʻli oʻtadi va shaharni Namangan, Andijon, Pop, Fargʻona, Kosonsoy, Gʻova, Varzik, Olmos, Axcha va boshqa aholi punktlari bilan bogʻlaydi.